Shillong, Nohprah 02 : U National President ka NPP Conrad K Sangma ba dei ruh u Myntri Rangbah ka Jylla ha ka sngi Ba-ar u la ong ba mynta ym donkam shuh ïa ka NPP ban pynpra ïa ka sem Congress namar ki la dep ban ïa pra hi para ma ki.
“Ngim donkam satia ban trei ban pynpra ïa ka ktem jong ki namar ki la dep pra lypa. Ka Congress ka la dep ïa pra lypa. Ki lah ban ïa shong lang ha kajuh ka miej ban ïa kren hynrei napoh napoh pat ki don la ki jong ki plan,” ong u Conrad haba kren bad ki lad pathai khubor hadien ba la wai ka jingïalang ha ophis treikam ka NPP.
Lah ban kdew hangne ba ka jingkren jong u Conrad ka la mih hadien khyndiat sngi ba u President ka Congress, Bah Vincent H Pala
U Conrad u ïathuh ruh ba ki ju ïa kren bad ïa kren bun bha bad ki nongïalam jong ka Congress na ka por sha ka por. “Kumta, ka iing jong ki kadei kaba la pra lypa naduh napoh bad kim donkam shuh ïangi ban pynpra shuh shuh ïa ki,” u la bynrap biang.
Shuh shuh u ong ruh ka long ka bym sngewtynnad ban ïohi ba u President ka MPCC ban kynthoh ïa ki kumtei. “Hynrei kane kam lei lei namar kadei ka jingsngew shimet jong ki,” u la ong.
U Conrad u la ong ruh ba na ka party ki la dep ban kren shai ba kam dei ïa ki ban ïakhun pyrshah ïano ïano hynrei ki wan da ka jingthmu kaba bha ban wanrah ka jingïatylli bad phah ka khubor jong ka jingïatylli na ka thain baroh kawei.
“Ngi thrang bad don ka thong ba ka thain shatei lam-mihngi jong ka Ri ki donkam ban treilang kawei ka bor namar ynda la poi sha ka sainpyrthei kan dei beit tang lada ïa tylli lang yn sa lah ban mih kum kawei ka bor ban pynsngew ïa ki mat jingdawa jongngi,” u la ong.
Shuh shuh u ong ruh ba kum ka party ki ieng beit ha ka nongrim ym ban ïakhun pyrshah ïano ïano hynrei ban trei bad shakri ïa ka jylla bad ïa ka thain hi baroh kawei.
