Khliehriat, Nailur 20: I kong Kyrmenlang Wahlang iba dei i kmie jong u bah Shibor Wahlang, na ka shnong Sutnga, mynta ka sngi i la plie donburom ïa kawei ka jaka sah pyngngad jong ki nongwan jngohkai pyrthei ka Sara’l Adventure Resort kaba don ha shnong Iapmala East Jaiñtia Hills District, ïa kane ka Resort la long trai da i bah Shiborlang Wahlang.
La plie paidbah ïa kane ka resort da kaba pynlong da ka jingiaseng ba kyrpang ha katei ka jaka, kum ka jingsngew nguh ïa u Blei uba la plie ïa ka lad ka lynti ban seng ïa kane ka jaka sahkai pyngngad kaba ithiang, ban kyntiew ïa ka thaiñ, kaba la ker sawdong da ka mariang kaba kup rong jyrngam.
Ha kane ka jingiaseng ba kyrpang la ïa don ryngkat lang ruh ki Tymmenbasan, ki Rangbah Balang na ka Balang Presbyterian Iapmala, balang Lumshken, balang Wah sarang bad balang Suchen, u MDC ka thaiñ u Dr Sanky Shangpung bad kiwei kiwei.
Na ka liang u bah Shibor Wahlang, u la pynpaw ka jingsngew nguh ïa u Blei uba la pynlah ïa u bah pynurlong ïa kane ka Resort kaba itynnad kaba long ruh ka burom ym tang ia ka East Jaiñtia Hills District hynrei ïa ka jylla hi baroh kawei, kumjuh ruh kane ka jingdon kane ka resort kan ïarap ïa ka ïoh kam ïoh jam jong ki briew jong kane ka thaiñ, la ong ruh ba u la jied ban buh ïa kane ka resort ha kane ka jaka namar ka shnong Iapmala ka dei ka shnong kaba itynnad haduh katta katta, kaba kup da ki rong ba jyrngam ha baroh ki sawdong sawkun, ym tang katta ha kane ka shnong ki don bun ki kshaid kiba ithiang kum ka kshaid Lamu bad kiwei kiwei, ka long ruh ka jaka kaba khring bha ïa ki nongjngohkai pyrthei bad ïa ki briew kiba ieid mariang.
Kum ban shu bynrap, ha kane ka jaka kaba don ka kshaid Lamu, ki don ruh ki jait syntiew kiba ju khot ki La tu thing, ha kaba ha kito ki snem kiba la leit ka la don ruh ka tamasa ba la pynlong ba la khot ka ‘La tu thing Festival’ kaba la khring shisha ïa kiba bun ki briew ieid mariang, ym tang katta, ka dei ruh ka jaka kaba biang bha ban iaid kjat lane ban leh tracking ban pynsngewbha bad ka mei mariang.
Shuh shuh, ka shnong Iapmala ka dei ruh kawei na ki shnong ha East Jaiñtia Hills District kaba la khring ïa kiba bun ki nongjngohkai pyrthei naduh ki por kiba kham mynshwa bad haduh mynta, la khmih lynti ba ka jingdon kane ka Sara’l Resort kan kham pynsuk shuh shuh ïa kito kiba wan na ki jaka kiba jngai bad kiba na bar ka jylla bad na bar ka ri ruh kumjuh kiba kwah ban sah bun sngi, bun taiew ha ka shnong Iapmala ban pynsngewbha bad ka mei mariang kaba kup rong jyrngam, ban leit jngoh kai ïa ki lum, ki wah, ki kshaid, ban leit jngoh ruh ïa ka jaka pyn mih bor ding ka Leshka kaba don ha kane ka thaiñ.
Ha kane ka sngi, ki la ïa don lang ruh ki longkmie, ki khynnah, ki khyllung kiba na shnong Iapmala bad na ki shnong ba mar jan ha kaba ki la dap da ka jingkmen bad phuh mut phuh mat bad ki da sngew kmen ruh ba ka la don kum kane ka resort ha ka thaiñ ka ban long ka jingkyrmen ïa ki shnong ki thaw baroh jong ka thaiñ.
