Shillong, Naitung 1 : U President jongka MPCC u ma Vincent H Pala u la ong ba ka saiñ pyrthei ha Meghalaya bad West Bengal ka ïapher bak ly bak.
“ Ka jingmut jingpyrkhat jongka saiñ pyrthei ha West Bengal kam ïadei satia bad ka Meghalaya. Ha Meghalaya ngim pat ju ïa shun thlong mluh thlong sying hapdeng ka Liang Synshar bad ka Liang Pyrshah namar ngi ïakren ïa khana beit. Nga lah ban ïa kynduh ïa kino kino ki President jong kino kino ki Party ruh na ka bynta ka bha ka miat ki paidbah.Katba ha West Bengal ne ha kiwei kiwei ki jylla kim ïa long kumta.
Haba ïakren bad ki lad pathai khubor halor ka jingkynnoh jong u General Secretary ka AITC U Abhishek Banerjee ba ka BJP bad ka Congress ki don ka jingïadei ha Meghalaya hadien ba ula wan ïa kynduh ïa u Lamphang ka ïing Dorbar u bah Metbah Lyngdoh, u la ong “Ngi hangne ha Meghalaya ngi iapher bha na kiwei ngim buh ïa ka party hakhmat ïa ki paidbah shadien hynrei ngi ïatrei lang na ka bynta ka jingbha ki paidbah. Ha West Bengal ka Trinamool Congress kam ïadei bad kiwei kiwei ki party kiba don ha ka liang pyrshah. Na kata ka daw nga ong ba ka saiñ pyrthei ha kane ka jylla bad West Beangal ka ïapher”.
U la ong ruh ba kum ka nuksa phi tip hi baroh ki MLA ka Congress ki la phet lut bad wat ki san ngut kiba shah sospon ruh ka Congress ka la dep sei kyrtong kumta ban ong ba ka Congress ka ïatrei lang bad ka BJP kam don satia hynrei dei tang namar ba ki san ngut ki ïatrei lang bad ka sorkar sa shah kynnoh ka Congress.
Ki san ngut kiba shah sospon ki long Kong Ampareen Lyngdoh, bah Mohendro Rapsang, bah Kimfa S Marbaniang, bah Mayralborn Syiem bad bah PT Sawkmie
