Ka SAATHI Campaign kaba na ka bynta ban pynioh ïa ki hok jong ki khynnah lyngba ka DLSA, East Jaiñtia Hills District
Khliehriat, Jylliew 18 : Ka National Legal Services Authority (NALSA) mynta ka sngi ka la pynbna paidbah ïa ka SAATHI Campaign (Survey for Aadhaar and Access to Tracking &Holistic Inclusion) bad kane ka long ban pynioh ïa ka hok kaba katkum ka aiñ ha ka imlang ka sahlang ïa ki khynnah kaba long katkum ka kyndon aiñ ne ka Article 39 (c) bad (f) jong ka riti synshar ri ne ka Constitution jong ka ri India.
Katei ka SAATHI ka long ka prokram ialap paidbah ban pynshai halor ka hok jong ki khynnah, ka thong jong ka jingialap paidbah ne campaign ka long bad tip bad ithuh bad ruh ban iarap ïa ki khynnah kito kiba im ha surok, kiba im ha ki jaka bym khuid ne slums, ha ki railway stations, ki khynnah khun swet ki bym don ka ïing ka sem kaba tikna ki bym ioh jingkyrshan na ïing kiba la shu iehnoh khlem don ba peit ïa ki khamtam kito ki bym pat rung kyrteng ha kino kino ki jaka ri khun swet ne ki child care homes, ki bym pat don ki kot ki sla kiba biang kum ki Aadhaar Cards ki ban ïarap ban pynioh ïa ki lad jingmyntoi kiba na ka sorkar ha kaba iadei bad ka pule puthi, ka jingai jingsumar ei ïa ki bad ki lad jingiada bapher bapher kiba hapoh ki kyndon jong ka Child Welfare Laws.
Kumta ha kaba ïadei bad ka jingpynrung kyrteng ha u Aadhar na ka bynta ki khynnah kiba la shu iehnoh khlem don ba peit ïa ki kan sdang naduh ka 27 tarik u jylliew 2025 ha ophis jong ka District Legal Services Authority (DLSA), East Jaiñtia Hills District, Khliehriat naduh ka por long trei haduh 5 baje janmiet jong ka 5 tarik u bnai nailar 2024.
Na ka liang ka DLSA, East Jaiñtia Hills District kan iarap rad ruh bah ban pynioh ïa ki synrnot sngikha lane kata ka Legal Assistance in Birth Certificate applications, ban kyrshan skul bad ruh ban pynioh ha ki ïa ki lad ioh jingmyntoi kiba dei ki Welfare Schemes bad ki lad jingiada kiba hapoh ka aiñ Child Rights Laws.
Ha kaba ïadei bad kane ka jingialap paidbah ne ka campaign halor ka SAATHI Campaign, la ong ba baroh ki paidbah ki lah ban ïa shim bynta lang da kaba kin sngewbha ban pyntip sha ka ophis jong ka District Legal Services Authority (DLSA), East Jaiñtia Hills District, Khliehriat bad ruh kum ka jingtrei mon sngewbha ban pynlong ïa ka jingwad bniah ne jingjurip bad ruh ban pynbna paidbah halor ka jingthmu bad ka thong jong kane ka SAATHI Campaign kaba na ka bynta kito ki khynnah kiba dei ban ioh ïa ki hok jong ki kiba katkum ka aiñ ha kaba ki lah ruh ban shu e-mail dlsa.khliehriat@gmail.com lane ban phone sha ka NALSA Helpline 15100, kane ka long katkum u kyrwoh ba la phah lyngba u Secretary, District Legal Services Authority (DLSA), East Jaiñtia Hills District, Khliehriat.