Ka ‘Rozgar Mela’ ka pynlong ryntih ïa ka jingthep kam Sorkar

Kito kiba trei ha ki kam kiba ïadei bad ka histori ha ki por ban wan kin sa ong ba ha kine ki 9 snem ba la dep kum u Myntri Rangbah Duh, katba u Narendra Modi u la pyrshang ban pynïaid ryntih ïa ka jingthep kam sorkar da kaba wanrah ïa ka jingpynlong ïa ki Rozgar Mela man ka por bad ka jingwanrah ïa ki jingkylla kum ka jingpynduh ïa ki interview ban pynthikna ïa ka jingshai ha ka jingthep kam, ha kawei ka liang pat u la pyni ïa ka ri kiwei kiwei ki lad ïoh kam ki bym dei ki kam sorkar lyngba ka jingkyntiew ïa ki kam StartUp kaba la ïalam sha ka jingkiew 300 shah ka jingdon ki StartUp sha jan 1 lak tylli ha kane ka ri, palat 100 tylli ki Unicorn bad ka jingkiew ka India sha ka kyrdan kaba 3 ha ki kam startup ha ka pyrthei.
Ha kajuh ka por, u Myntri Rangbah Duh u la shim lut ïa baroh ki lad ba u ïoh ban pynkynmaw ïa ki samla kiba sdang ïa ka kam kaba thymmai, la ki dei ki kam sorkar ne kiwei kiwei ki kam, shaphang ka bynta kaba kyrpang jong ki ha ka Amritkal ha kine ki 25 snem ban wan shuwa ka jingdap 100 snem ka jingïoh jinglaitluid ka India ha u snem 2047.
Ka Rozgar Mela ka dei ka sienjam na ka bynta ka jingpynurlong ïa ka jingtrei shitom u Myntri Rangbah Duh ban plie ki lad ïoh kam ha ka ri. La kyrmen ba ka Rozgar Mela kan long ka jingplie lad ïa ka jingïoh kam bad plie ïa ki lad na ka bynta ki samla na ka bynta ka jingpynkupbor ïa ki bad ka jingïashim bynta jong ki ha ka jingtei ïa ka ri.
Naduh ba la sdang ïa ka ha ka 22 tarik u Risaw 2022, la pynlong ïa ka Rozgar Mela ha hynriew tylli ki bynta ha kylleng ka ri, ha kaba la sam palat 4.25 lak ki shithi thung kam ïa ki samla. Ïa ka bynta kaba hynriew la pynlong ha ka 13 tarik u Jylliew 2023 ha 45 tylli ki jaka ha kylleng ka ri. Ïa ka jingthung kam la pynlong ha ka rukom treikam kaba shai bad kaba bat ïa ka por da ki kynhun thung kam kum ka Staff Selection Commission (SSC), Union Public Service Commission (UPSC), ki Railway Recruitment Board (RRB) bad kiwei kiwei.
Kine ki samla kiba dang shu ïoh kam, ki dei kiba na kylleng ka ri bad kiba don ki sap bapher bapher. Kin rung ha ki tnat sorkar bapher bapher kiba peit ïa ki kam kiba ïadei bad ka pisa pilain, ki iing dak, ki skul, ki kam khajna, Atomic Energy, ka tnat kam ïada ri, ka tnat ka koit ka khiah bad ka tnat kam rel.
Ban kyntiew shuh shuh ïa ki sap jong ki nongtrei sorkar bad ban pynbiang ïa ki lad pyntbit ha kaba ki nongtrei sorkar ki lah ban pyntbit hi ïalade katkum ki jingdonkam jong ki kam ba ki trei, u Myntri Rangbah Duh u la pyllait paidbah ïa ka sienjam Mission Karmayogi. Kane ka rynsan online ka ai shibun ki lad ïoh jingpyntbit lyngba ka e-learning ha kaba ki nongtrei ki lah ban pyntbit ïalade. Haduh mynta, palat 5 lak ki karmayogi na ki tnat sorkar bapher bapher ki la pynrung kyrteng ïalade ha kane ka rynsan ai jingpyntbit. Da kaba kynmaw ïa ki jingdonkam jong kito kiba dang shu rung ha ka kam, u Myntri Rangbah dang shen u la pyllait paidbah ïa ka Karmayogi Prarmbh, ka online module ha ka rynsan igotkarmayogi ha kaba la pynbïang palat 400 tylli ki jingai jingpyntbit lyngba ka e-learning kaba lah ban ïoh na kano kano ka jaka da kaba pyndonkam ïa kano kano ka mobile, tablet ne kor computer. Kine ki jingai jingpyntbit ki peit ïa ka jingsngewthuh ïa ka jingïoh mynsiem, ka jingïada na ka jingshah thombor, ki kyndon treikam jong ki nongtrei sorkar, ka jinglong nongïalam, ka jingdonsap ha ki jingïakren, ka jingpyn-duna ïa ki jingkhuslai, ha ryngkat ki jinghikai ïa ka Microsoft Excel bad Word. Da kaba pynkupbor ïa ki nongtrei kumne, ka sorkar ka thmu ban kyntiew ïa ka jinglah treikam jong ki bad jong ka sorkar, ha kaba ka don ka jingtbit ha ka jingtreikam bad ka jingsaindur thymmai.
Ha ryngkat ka Rozgar Mela bad ka sienjam Karmayogi Prarambh, ka DoPT ka la wanrah shibun ki jingpynkylla ban pynïaid ryntih ïa ki kam bad ban pynthikna ïa ka jingshai ha ki kam. Ki jingpynkylla kiba kham kongsan ki long ka jingpunduh noh ïa ki interview ïa ki post Group C bad Group D, ka jingpyn-kylla sha ki eksam ba don nongrim ha ki kor computer bad ka jingwanrah ïa ka jingpynshisha dalade ïa ka kot ki sla.
Ka jingtrei jong ka sorkar Modi na ka bynta ki kynhun ba shem jingeh ha ka imlang sahlang ka long kaba paw shai lyngba ki sienjam kum ka jingplie shibun ki lad ïa kito kiba la shongthait na ki kam ïada ri bad ka jingpynthikna ïa ka jingbuh kyrpang ïa kito kiba don jingduna ha ki dkhot met.
Katba ka sorkar ka dang bteng ban pynbiang ïa ki lad ïoh kam sorkar lyngba ka Rozgar Mela, ka dang trei ruh ban kyntiew ïa ki lad ïoh kam ha ki kam shimet bad ki kompani. Ki sienjam kum ka PM Gatishakti National Master Plan, ka jingpynïar ïa ki surok bah bad ki kad liengsuin, ka jingtei ïa ki lynti rel metro bad ki lad ka leit ka wan lyngba ki jaka shong um, ka jingkyntiew ïa ki startups, ka jingpynpoi surok sha ki jaka nongkyndong, ka jinglah pynmih bording na ki tyllong kiba lah ban pynthymmai, ka jingkyntiew ïa ka jingshna mar hapoh ki sienjam Make in India bad Atmanirbhar Bharat, ki la ïarap bha ha ka jingplie lad ïoh kam. La sdang ïa ka PM Gatishakti National Master Plan ban pynstet ïa ki projek kiba ïadei bad ki jingdon jingem, katba la kyrmen ba ka jingpynïar ïa ki surok bah bad ki industrial corridor kin plie shibun ki lad ïoh kam. Ki kad liengsuin bad ki lynti rel metro ki la kham bun bad ka jingkyntiew ïa ki lad ka leit ka wan lyngba ki jaka shong um, ka jingkiew ki start-up, ka jingpynpoi surok sha ki jaka nongkyndong, ka jinglah pynmih bording na ki tyllong ba lah ban pynthymmai bad ki kam pynkylla digital ki la kyntiew ïa ki lad ïoh kam.
Ka jingtrei shitom u Myntri Rangbah Duh ban pynïaid kam ïa ka bor jong ki samla ha ka India mynta ka dang bteng ban paw ha man ki kam ba u sdang.