Shillong, Nohprah, 18: U Myntri Rangbah duh u Narendra Modi bad u Myntri ka tnat Kam Pohiing bad Cooperation u Amit Shah ki la ïashim bynta ha ka jingrakhe ïa ka Jubili Ksiar jong ka North-East Council (NEC) ha nongbah Shillong ha ka sngi u Blei.
Ha kane ka jingïalang, bun ki kynrem ki lyndan ba kynthup ïa u Lat ka jylla Meghalya u Brig. (Dr) B. D. Mishra, u Myntri Rangbah ka jylla Meghalya u Conrad Sangma bad ki Myntri Rangbah jong ki jylla ka thaiñ Shatei Lammihngi ki la ïadonlang.
U Amit Shah haba kren ha kane ka jingïalang u la ong ba ha ka jingïalang ba la long dang shen jong ka North- East Council (NEC) ba la pynïaid da u Myntri Rangbah duh, u Narendra Modi, u Myntri Rangbah duh ym tang ba u la ïaroh ïa kam ba la leh ha ki 50 snem ba la leit ha ka North-East Council hynrei u la bthah ruh ka jingpynkhreh ïa ka Blueprint jong baroh ki bynta jong ka roi ka par jong ka thaiñ Shatei Lammihngi ha ki 25 snem ban wan bad ban buh ïa ki thong. Mynta, hapoh ka jingïalam jong u Myntri Rangbah duh, u Narendra Modi, ka thaiñ Shatei Lammihngi ka ïaid shaphrang ha ka lynti jong ka shongsuk shongsain bad ka roi ka par.
U Shah u la ong ba mynshuwa ka jingmang pisa sha ka thaiñ Shatei Lammihngi kam poi sha baroh ki bynta hynrei hadien ba u Narendra Modi u la long Myntri Rangbah duh ka ri, ki jingmang pisa ki la poi sha ki shnong bad la pyndonkam na ka bynta ka roi ka par, bad kane kalong ka jingjop kaba khraw. U la ong ba u Myntri Rangbah duh u ju phaikhmat kyrpang sha ka thaiñ Shatei Lammihngi. U Myntri Rangbah duh u la wan jngoh ïa ka thaiñ Shatei Lammihngi palat 50 sien ha ki 8 snem ba la leit, katba ki Myntri ruh ki la wan jngoh ïa ka thaiñ Shatei Lammihngi palat 400 sien.
U u la ong mynshuwa ka roi ka par jong ka thaiñ Shatei Lammihngi ka sahkut namar ka jingduna ka jingmang pisa sha ka North- East Council, hynrei u Myntri Rangbah duh u la saindur thymmai bad wanrah ka bynta ba thymmai ha kaba ïadei bad ki jingdon jingem jong ka thaiñ Shatei Lammihngi da kaba sdang ïa ki projek ba heh ha ka kyrdan jong ka sorkar pdeng. Namar ka jingkiew ha ki jingdon jingem, ki kam jngoh ruh ki la kiew ha ka thaiñ Shatei Lammihngi, kumjuh ruh la plie bun ki karkhana barit baria, ki jaka pule bad ki jaka ba ïadei bad ki kam ïalehkai. U la ong ba u Myntri Rangbah duh u la sdang ruh ïa ka projek ban pynïasoh ïa man ka nongbah jong ki jylla ka thaiñ Shatei Lammihngi da ki surok kali, rel bad liengsuin.
U Myntri ka tnat Kam Pohing u la ong dei namar ka jingïalam jong u Narendra Modi ka thaiñ Shatei Lammihngi mynta ka lait na baroh ki jingïakajia bad ka shongsuk shongsain ka la don ha ka thaiñ. Haduh phra snem mynshuwa, ïa ka thaiñ Shatei Lammihngi la bna tang ka jingdon ki jingpakhang, ki jingïakhih, ki jingjia bthei bomb bad ki jingïasiat bad ki briew jong ka thaiñ Shatei Lammihngi kim lah ban im suk im sain namar ki kam pyntriem jong ki kynhun kieng atiar bapher bapher. Ha ki phra snem ba la leit ka la don ka jingduna 74% ki jingjia pyntriem ki lehnoh, ka jingduna 60% ki jingjia thombor ïa ki kynhun shipai bad ka jingduna 89% ka jingïap ki riewpaidbah, katba kumba 8,000 ngut ki samla ki la wan pyndem bad ïasoh bad ka imlang sahlang. U Shah u la ong ba kine kilong ki jingjop bakhraw kiba la lah ban urlong namar ka jingïalam u Myntri Rangbah duh u Narendra Modi bad khlem ka shongsuk shongsain ym lah ban wanrah ïa ki kynhun kiba wanrah ïa roi ka par, ka pule puthi bad ka koit ka khiah.
U Shah u la ong ba ha ka por jong ka jingïalam u Myntri Rangbah duh u Narendra Modi, la mynjur ïa ka jingïasoi soskular bad ka NLFT ha u 2019, ka jingïakut bad ki Bru bad Bodo ha u 2020 bad ka jingïakut bad ki Karbi ha u snem 2021 ki dei kiba la pyndep. Ki jingïakajia pud hapdeng ka Assam- Meghalaya bad Assam- Arunachal ruh ki la jan poi sha kaba kut bad namar ka jinglah pynneh ïa ka shongsuk shongsain, ka thaiñ Shatei Lammihngi ka la ïaid sha ka lynti jong ka roi ka par. Ka nuksa kaba khraw tam jong kane kalong ba mynshuwa ka ju don ka jingdawa ban weng ïa ka AFSPA na ka thaiñ Shatei Lammihngi, hynrei mynta ka jingdawa kam don shuh, namar ka sorkar India ka la shim ïa ki sienjam ban weng ïa ka AFSPA. U la ong mynta 60% ka jaka jong ka Assam, hynniew tylli ki distrik jong ka Nagaland, 15 tylli ki thanat ha hynriew tylli ki distrik jong ka Manipur bad Tripura bad Meghalaya ki la lait pura na ka AFSPA, katba ha tang kawei ka distrik ha Arunachal ym pat weng ïa ka AFSPA.
U la pynpaw ruh ka jingngeit skhem ba ka NEC bad ki Myntri Rangbah jong ki Jylla ka thaiñ Shatei Lammihngi kin trei da ka jingkut jingmut ban pynurlong ïa ki thong ba la buh na ka bynta ka NEC da u Myntri Rangbah duh, u Modi ban ïarap ban kyntiew ïa ka thaiñ bad ban wanrah ïa ka thaiñ Shatei Lammihngi kaba la kiew, kaba shongsuk shongsain bad kaba plie ki lad ïoh kam kumba long kiwei ki thaiñ jong ka ri.
