New Delhi Nailur 14: U Myntri Sorkar Pdeng ba dei khmih ïa ki tnad Kam Pohïing bad kam ïatreilang Amit Shah u la wan ban ïashimbynta kum u kongsan ha ka jingïalang kaba 5 jong ka Akhil Bhartiya Rajbhasha Sammelan ha Gandhinagar, ka nongbah jong ka Gujarat, ha ka sngi rakhe ïa ka Hindi Diwas 2025. Ha kane ka sngi la donlang ruh u myntri rangbah ka jylla Gujarat u Bhupendra Patel, u myntri ka sorkar pdeng u Arjun Ram Meghwal, u Myntri Khynnah ka tnad Kam Pohïing jong ka sorkar pdeng u Bandi Sanjay Kumar bad katto katne ngut kiwei pat ki kynrem ki lyndan.
U Myntri Kam Pohïing jong ka sorkar pdeng bad u myntri ka tnad treilang u la pyllait paidbah ruh ïa katto katne ki kot. Haba ai jingkren ha kane ka jingïalang, u Myntri Kam Pohïing jong ka sorkar pdeng uba dei ruh u Myntri ka tnad ïatreilang u la ong ba ka ktien Hindi ka dei ka paralok jong ki ktien ka India bad ba kam don kano kano ka jingiatyngkhuh hapdeng ka ktien Hindi bad kiwei pat ki ktien India. U Shah u la ong ba ka nuksa kaba khraw tam ïa kane ka dei ka jylla Gujarat. Ha Gujarat, ki riewstad kum u Swami Dayanand Saraswati, u Mahatma Gandhi, u Sardar Vallabhbhai Patel, bad u K. M. U Munshi ki la pdiang ïa ka ktien Hindi bad ki la kyntiew ruh ïa ka. U la ong ba ka jingïadonlang jong ka ktien Gujarati bad ka Hindi ka la pynlong ïa ka Gujarat kum ka nuksa kaba bha tam ha ka jingroi jong baroh ar tylli ki ktien. U Shah u la ong ba ka ktien Hindi ka dei ka bynta jong ka rukom hikai jong ka Gujarat, bad namar kane, ka jingpoi jong ki khynnah jong ka Gujarat ka la nang kiew bha ha kylleng ka ri. U la bynrap ruh ba bun ki nongïalam kiba don ka jingïohi jngai ki la hikai ïa ki ktien India ban ïakren iwei ïa iwei pat bad u la kyntu ban kyntiew ïa ka ktien Hindi ha man la ki jylla, kum ka jingmih na kane u briew na Gujarat u lah ban leit shano shano ha ka ri bad ban pynïaid ïa ki kam khaïi da kaba suk bad kumjuh ruh ban ïoh ïa ka jingpdiang ha kano kano ka jaka ba u don.
U Amit Shah u la ong ba ha kine ki san snem ba la dep, la pynlong ïa ka Akhil Bhartiya Rajbhasha Sammelan shabar jong ka nongbah Delhi ha ki jaka bapher bapher jong ka ri, kaba la ai ka lad kaba biang bha ban pynkhlaiñ ïa ka jingïakren hapdeng ka ktien Hindi bad kiwei pat ki ktien jong ka India. U la ong ba ka jingshem jong ki saw tylli ki jingïalang ba la dep ka long ba kum kine ki jingïalang ki ai ïa ki jingmut kiba thymmai, ka bor, bad ka jingai mynsiem. U Shah u la bynrap ruh ba ka ktien Hindi kam dei ban sah tang kum ka ktien ïakren bad synshar, hynrei ka dei ruh ban long ka ktien jong ka science, ka teknoloji, ka kam aiñ, bad ka kam pulit. U la bynrap ba haba baroh ki kam ki long ha ki ktien jong ka India, ka jingïadei bad ki paidbah ka nang kham jylliew.
U Myntri Kam Pohïing ka sorkar pdeng u la ong ba ka rukom pynkylla ktien Sarathi ka pynsuk ïa ka jingpynkylla ktien na ka ktien Hindi sha baroh ki ktien India ba la ithuh. U Shah u la kyntu ïa baroh ki Myntri Rangbah jong ki jylla ban phah shithi sha u ha la ki jong ki jong ki ktien, da kaba pynthikna ba ïa ki jubab yn phah ha kajuh ka ktien. U la ban jur ba ka rukom pynkylla ktien Sarathi ka long kaba la pynkhreh ban pynkylla ktien ha kano kano ka ktien bad ruh ban pynkylla ïa ki jubab na ka ktien Hindi sha ka ktien jong u nongpdiang.
U la bynrap ruh ba, ha ki sngi ban wan, ka jingïakren lyngba ka Sarathi kan long ha ka ktien tynrai la jong. U Amit Shah u la ong ba u Chhatrapati Shivaji Maharaj u la pynksan ïa ki lai tylli ki nongrim ba kongsan ha ka jingïakhun na ka bynta ka Swaraj: Ka Swaraj, Swadharma bad Swabhasha, kine baroh ki ïasnoh lang bad ka jingsarong na ka bynta ka ri. U la ong ba ka ri kaba ka ktien kren kam dei la ka jong kam lah ban mad shisha ïa ka jinglaitluid ne ka jingsarong. Ban kyntiew ïa ka jingsngew sarong ha ki ktien jong ngi, la thaw ïa ka Shabd Sindhu dictionary, kaba la sdang da ki 51,000 kyntien bad mynta ka la palat ïa ka 7 lak kyntien. U Shah u la ong ba ha u snem 2029, kan long ka dictionary kaba heh tam ha ka pyrthei. U la ong ba kane ka dictionary ka pynlong ïa ka ktien Hindi kaba kham jem, kaba long kaba donkam ban long ka ktien kren kaba la pyndonkam bha. Ka jingpyndonkam ïa ka Shabd Sindhu dictionary kan plie ïa ka ktien Hindi kaba bun rukom, kaba lah ban pynïadei, bad kaba lah ban pdiang da baroh.
U Myntri Kam Pohïing jong ka sorkar pdeng u la ong ruh ba u Mahatma Gandhi u la nohsynniang shibun ha ka jingpynwandur ïa ka Gujarati dictionary, da kaba ithuh ba ka imlang sahlang kam lah ban ïeng ha ka pyrthei khlem ka ktien tynrai kaba khlaiñ. U la bynrap ruh ba u Myntri Rangbahduh ka ri u Narendra Modi u la leh ïa ki kam kiba bun na ka bynta ka bha ka miat jong ki riew shimet kiba don jingduna ha ki dkhot met. U Shah u la ban jur ïa ka jingdonkam ban pyndonkam ïa ka saïan bad ka teknoloji ban plié lad pura ïa ka sap jong ki. U la kren shaphang ki ïitkhmat ba pyndonkam da ka AI ba la pyni ha katei ka jingïalang, ka ban ïarap shibun ïa ki briew kiba duna ka bor ïohi. Da kine ki ïitkhmat, wat kito kiba duna bha ka bor ïohi ki lah ban pule kot, bad ki lah ban ïohsngew ïa kano kano kaba ki pule ha ka ktien tynrai jong ki lyngba ka jingpyndonkam da ka AI.
U Myntri Kam Pohïing jong ka sorkar pdeng uba dei ruh u Myntri ka tnad ïatreilang u la ong ba u Mahatma Gandhi u ju ong ba ka ktien Hindi ka dei ka ktien kaba pynlong ïa ka ri kaba ïatylli. U la ong ba ka Sanskrit ka la ai ha ngi ïa ka jingstad, ka Hindi ka la rah ïa kata ka jingstad sha man la ka ïing, bad ki ktien tynrai ki la pynphriang ïa ka sha man la u briew.
U Amit Shah u la ong ba u Myntri Rangbahduh ka ri u Modi u la leh shibun lyngba ka teknoloji ban pynkhlaiñ ïa ki ktien trai ri jong ngi. U la ong ba da ka jingpynshlur jong u Myntri Rangbahduh ka ri u Modi, ka tnad Kam Pohïing ka la thaw ïa ka Bhartiya Bhasha Anubhag hapoh ka tnad Official Language. Kane kan pynkhlaiñ ïa ka Hindi bad kan kyrshan bad kyntiew ruh ïa baroh ki ktien jong ka India. U Shah u la ong ruh ba hapoh ka jingïalam jong u Myntri Rangbahduh ka ri u Modi, ka tnad Official Language ka la pynïaid shakhmat ïa kiba bun ki sienjam. Ha kine ki saw snem ba la dep, ka Official Language Komiti ka la pynmih lai tylli ki kot, bad la pynkhreh ruh ïa ka kot kaba saw. U la ong ba la thaw ïa ki Komiti ha jan 539 tylli ki nongbah ha kylleng ka ri.
Kumba 3 lak 28 hajar ngut ki nongtrei sorkar kiba kren ïa ki jait ktien bapher bapher ki la shah hikai ha ka ktien Hindi. Nalor kata, 40,000 ngut ki nongtrei ki la shah hikai ha ka rukom type, 1,918 ha ka shorthand, bad 13,000 ha ka jingpynkylla ktien. U la ong ba u Myntri Rangbah Duh u la wanrah ïa ka eksamin JEE, NEET, bad UGC ha ki 12 tylli ki ktien, kaba la kyntiew ïa ka lad ïa ki samla pule kiba pule ha ka ktien tynrai ba kin ïoh ïa ka jingjop. U Shah u la ong ba ki eksamin na ka bynta ka Central Armed Police Forces (CAPFs) mynta la pynlong ruh ha ki 12 tylli ki jait ktien. U la pynkynmaw ba ha ki snem 1970, ki briew ki ju ong ba ka Hindi ka ïadei bad ki por ba la leit, hynrei mynta ngi lah ban ong da ka jingsngew sarong ba ka ktien sorkar bad ki ktien jong ka India jong ngi ki dei ki ktien jong ka lawei, bad kin sa long ruh ki ktien jong ka teknoloji, ka science, bad ka kam aiñ.
