New Delhi, Naiwieng 16: Ka Tnat Fertilizers, Sorkar India, ka la pynthikna ka jingdon ki sboh kiba biang, kynthup ïa ka Urea, ha kylleng ka ri ha ka aïom Kharif 2025. Lyngba ka jingthmu ha ka por kaba biang bad ka jingïatreilang bad kito kiba don bynta ha kane ka kam Kata ka Tnad Rel, Ports, ki sorkar jylla bad ki kompeni pynmih sboh, ka sorkar ka la pynthikna ba ki nongrep ki ïoh ïa ki jingdonkam jong ka Urea khlem kano kano ka jingduna kaba paw haba ngi ïohi haba ka don ka jingdonkam kaba 185.39 LMT kumba la buh da ka Tnad ka rep ka riang bad ka bha ka miat jong ki nongrep, ka jingdon kaba la pynthikna da ka DOF ka long 230.53 LMT kaba palat ïa ka jingdie kaba 193.20 LMT. Kane ka pyni ïa ka jingdon jong ka Urea kaba biang ha baroh kawei ka ri. Ka paw shai ba ki nongrep ki la pyndonkam kham bun ka Urea ha aïom Kharif-2025 haduh kumba 4.08 lak metrik ton haba ïanujor bad ka aiom Kharif 2024, kaba pyni ïa ka jingdon ka Urea kaba kham bha ban pynbiang ïa ki jaka rep kiba kham bun namar ka jingïoh ïa ka aïom slap kaba bha.
Ka DoF ka la ïai pyrshang tyngeh ban pyndap ïa ka jingduna hapdeng ka jingpynmih bad jingpyndonkam hapoh ka ri lyngba ka jingwanrah nabar ri. Ban pyndap ïa ka jingduna hapdeng ka jingpynmih hapoh ri bad ka jingdawa kaba nang kiew, ka sorkar ka la shim ïa ki sienjam ba kongsan ban kyntiew ïa ka jingwanrah nabar ri. Hapdeng u Ïaïong bad Risaw 2025, ka India ka la wanrah 58.62 lak metric ton ka Urea kaba lah ban pyndonkam ha ka rep ka riang, haba ïanujor bad 24.76 lak metric ton ha kajuh ka samoi ha u snem ba ladep. Kane ka jingkiew ha ka jingwanrah nabar ri ym tangba ka pyndap ïa ka jingdawa Urea kaba la nang kiew ha ka aïom Kharif 2025 hynrei ka la ïarap ruh ban tei ïa ki buffer stock kiba biang na ka bynta ka aïom Rabi ban wan. Kumta, ka jingdon ka Urea baroh ka la kiew na ka 48.64 lak metrik ton ha ka 1 tarik Risaw 2025, sha ka 68.85 lak metric ton ha ka 31 tarik Risaw 2025-kaba pyni ïa ka jingkiew kaba 20.21 lak metric ton. Ki bnai naduh u bnai Naitung haduh Risaw 2025 ki la sakhi ruh ïa ka jingpynpoi Urea kaba bun tam sha ki jylla (ha kaba ïadei bad ka jingpynkit ïa ki rake), kaba pynpaw ïa ki sienjam ba radbah jong ka sorkar ban pynthikna ïa ka jingpynpoi Urea ha ka por kaba biang na ka bynta ka jingmyntoi jong ki nongrep.
Ka jingpynmih Urea hapoh ri ruh ka la pyni ïa ka jingkiew, ha kaba ka jingpynmih hapoh u bnai Risaw 2025 ka la kot sha ka 26.88 lak metric ton, kaba kiew da 1.05 lak metric ton haba ïanujor bad ujuh u bnai jong u snem ba la dep. Ka jingpynmih kaba man la u bnai hapdeng u bnai Ïaïong-Risaw ka dang long kaba khlaiñ haduh 25 lak metric ton. Shuh shuh, ka jingwanrah nabar ri kaba long kumba 17.5 lak metric ton kiba la pynkhreh lypa na ka bynta u bnai Naiwieng bad Nohprah bad yn sa kyntiew shuh shuh lyngba ki sienjam ha ka por kaba biang.
Ki jingïaipyrshang ki don ha ka lynti na ka bynta ban kyntiew ïa ki bor pynmih mar hapoh ka ri. Artylli ki karkhana Urea ha Namrup, Assam bad Talcher, Odisha ki dang treikam bad ki lah ban pynmih mar 12.7 lak metric ton ha ka shisnem. La ïoh katto katne ki jingtyrwa ban kyntiew ïa ka jingpynmih urea bad ki dang don ha ka jingpyrkhat. Kine ki projek shisien ba la ïoh jingmynjur kin pynduna shibun ïa ka jingshaniah jong ka India ha ka jingwanrah nabar ri bad kan ïalam sha ka atmanirbharta ha ka jingpynmih urea.
Ha ka jingïatreilang bad ka Tnad ka rep ka riang, la bthah ïa ki ophisar jong ki jylla ba dei khmih ïa ka kam rep ban kyntiew ïa ka rukom sam bad kumjuh ruh ban shim ïa ki lad ki lynti kiba biang pyrshah ïa ka jingpynïaid bakla, ka jingshalan tuh, ka jinglum bad ka jingdie beaiñ bad kumjuh ruh ka jingpyndonkam palat ïa ka Urea. Bun ki jylla ki la shim ïa ki sienjam bad sdang ban pyntreikam ïa ki tiar kiba thymmai na ka bynta ban peitngor bad ka jingpyndonkam ïa ka Urea ba la pynduna dor.
Lyngba ka jingpynkhreh kam lypa, ka jingpynpoi mar kaba paka, bad ka jingïatreilang, ka Sorkar India ka dang ïai bteng ban pynthikna ba uwei pa uwei u nongrep un ïoh ïa ka Urea ha ka por kaba biang – ka sienjam kaba kongsan na ka bynta ka jingkiew ka kam rep bad ka jingpynbiang bam jong ka India.
