Nongstoiñ, Jylliew, 12: Ka HYC West Khasi Hills District, ka dap da ka jingsngew kmen kaba khraw ha ka jingmih jong ka result ka SSLC bad ka HSSLC jong une u snem. “Ngi kum ka seng ngi pynpaw ïa ka jingsngewnguh ïa ki skul bapher bapher kiba don ha West Khasi Hills District baroh kawei. Ngi phah ïa ka jingsngewnguh khamtam eh ïa ka skul Anderson Higher Secondary School kaba lah rung sha ka top 20 jong ka SSLC”.
“Ka jingsngewnguh sngew burom kaba khamtam eh, ka leit sha ki khynnah samla pule, kiba lah trei shitom khlem tyngkai ïa ka por ban wanrah ïa u soh jong ka jing jop. Ka jingjop jong phi baroh ka long ka jingkhraw ym tang ïa phi ki skul ne ki khynnah ne samla pule, hynrei ïa ka dong ka thaiñ bad ka jaitbynriew hi baroh kawei”.
“Ka HYC West Khasi Hills ka pynpaw ïa ka jingsngewnguh ka kyrpang eh ïa ki kmie ki kpa, kiba kyrshan met bad mynsiem ïa la ki khun ban pyndep ïa ki kyrdan pule bapher bapher haduh mynta. Ngi na ka seng ngi ai mynsiem ïa ki longkmie ki longkpa, bad ïa baroh ki nongkyrshan ïa ki khynnah samla pule ha kano kano ka kyrdan pule bad ka seng ka long kaba kloi ban ai ka kti kamon ka kti kadiang haba don hapdeng ka jingeh”.
Ka seng ka kyntang ïawai ka phah u kyrwoh sha ki samla pule ka dong ka thaiñ jong ka West Khasi Hills District, ba phin nang ïa trei minot ha la ki jingpule jong phi bad ngi ngeit skham ba na ka don ka thaiñ jong ngi, kin mih bun ki riew stad ki ban long ka jingmyntoi ïa ka imlang sahlang ha ka don ka thaiñ bad ka jaidbynriew hi baroh kawei”.
“Kawei ngi kyrpad rit ïa phi ban phai khmat ruh ïa kaba pule ïa ki kyrdan kum ki IAS, MCS, IPS, MPS bad kiwei ban kyntiew ïa ka Jaitbynriew kum ki Jaitbynriew Naga, Mizo bad kiwei. Ban synshar hi dalade ïa ka Jylla ym ban shah synshar ha kiwei. Ka Jaitbynriew kaba khlaiñ ka dei ka Jaitbynriew kaba synshar hi”, ong ka kyrwoh khubor kaba la phah da u Ïarapbha Shangrit Education Secretary West Khasi Hills District.
