New Delhi, Jylliew 24: U Myntri Rangbah Duh ka ri, U Narendra Modi haba ai jingkren sha ki lad pathai khubor shuwa ban sdang ka dorbar ba nyngkong jong ka 18 Lok Sabha mynta ka sngi u la ong ba ka ri ka donkam ïa ka liang pyrshah kaba khlaiñ khnang ban lah tei ïa ka ri India.
U Myntri Rangbah Duh u la sdang da kaba ong ba kane ka dei ka sngi jong ka jingsngewsarong ha ka synshar paidbah, kadei ka sngi jong ka burom. Ha ka sien ba nyngkong naduh ba ïoh jinglaitluid, ban ïoh bam smai ha ka ïing dorbar thaw aiñ Parliament ba thymmai. “Ha kane ka sngi kaba kongsan, nga pdiang sngewbha ïa ki MP ba shah jied nyngkong bad nga kitbok kitrwiang ïa baroh,” ong u Myntri Rangbah Duh.
U la ong ba ka jingwan jong kane ka Parliament ka dei ka lad ban pynurlong ïa ki jingthrang jong ki briew jong ka India bad u la ong ba ka dei ka lad kaba kongsan bha ban kot sha ka jingstet shuh shuh bad ki kliar ba thymmai da ka jingshit rhem ba thymmai.
U la ong ba ka 18 Lok Sabha ka sdang mynta ka sngi ban pynurlong ïa ka thong ban tei ïa ka India kaba la kiew shaphrang shwa u snem 2047. U Myntri Rangbah Duh u la ong ba ka jingpynlong ïa ka elekshon kaba heh tam ha ka pyrthei ka dei ka burom na ka bynta 140 klur ngut ki briew jong ka ri.
“Palat 65 klur ngut ki nongjied nongmihkhmat ki la ïashim bynta ha kane ka kam,” la ong u Myntri Rangbah Duh da ka jingkmen katba u la kdew ruh ba kane ka dei tang ka sien kaba ar naduh ba ïoh jinglaitluid ba ki briew jong ka ri ki la jied ïa ka Sorkar ban bteng lai sien kynthih. “Kane ka lad ka la wan hadien 60 snem bad ka long shisha ka burom,” u la bynrap.
U Myntri Rangbah duh u la ai jingsngewnguh ïa ki briew kiba la jied ïa ka Sorkar ba kan bteng lai sien bad u la ong ba kane ka dei ka dak jong ka jinghun ki briew ïa ki jingthmu jong ka Sorkar, ki polisi jong ka bad ka jingtrei shitom jong ka na ka bynta ki briew.
“Ha kine ki 10 snem ba la dep, ngi la pyrshang ban wanrah ïa ka rukom treikam ba kyrpang namar ngi ngeit ba donkam ïa ka jingbun paid ban pynïaid ïa ka sorkar hynrei ka jingïahab jingmut ruh ka long kaba donkam bha ban pynïaid ïa ka ri,” la ong u Myntri Rangbah duh.
U la ong ba ka dei ka jingpyrshang jong ka Sorkar ban ai jingshakri ïa ka Maa Bharati da kaba wanrah ïa ka jingïahab jingmut bad da kaba ïamir jingmut lang bad baroh ban pynurlong ïa ki jingthrang bad ki jingangnud jong ki 140 klur ngut ki briew jong ka ri.
Da kaba ban jur halor ka jingïamir jingmut lang bad baroh bad pynstet ïa ka jingshim ïa ki rai hapoh ka Riti Synshar jong ka India, u Myntri Rangbah Duh u la ong ba u kmen shaphang ka jingbun ki MP ba dang samla kiba la bam smai ha ka 18th Lok Sabha.
U la kren shaphang ka jinglong kyrpang u nombar 18 katkum ki jingngeit ha India, ha kaba u la ong ba ka Gita ka don 18 tylli ki lynnong kiba ai ïa ka khubor jong ka karma, ka kamram bad ka jingsngewlem, don 18 tylli ki Purana bad Uppurana, shiteng u nombar 18 ka long 9 kaba dei ka dak jong ka jingbiang tam, bad ka rta ban ïoh thep vote ha India ka dei 18 snem. “Ka 18th Lok Sabha ka dei ka Amrit Kaal jong ka India. Ka jingwan jong kane ka Lok Sabha ka dei ruh ka dak kaba shongkun,” la ong u Modi.
U Myntri Rangbah Duh u la ong ba lashai ka dei ka 25 tarik u Jylliew. 50 snem mynshwa ha kane ka sngi, ka la wan ka jingsynshar emergency bad ba kane ka dei ka dak ïong ha ka Riti Synshar. U Modi u la ong ba ki pateng mynta kin ym klet lano lano ruh ïa katei ka por ba la kyntait ïa ka Riti Synshar da kaba leh klet ïa ka synshar paidbah bad la pynkylla ïa ka ri sha ka phatok.
U Myntri Rangbah Duh u la kyntu ïa ki briew ba kin kut jingmut ban ïada ïa ka synshar paidbah jong ka India khnang ba kane kan ym jia shuh lano lano. U Myntri Rangbah Duh u la ong, “Ngin kut jingmut ban don ka synshar paidbah kaba khlaiñ bad ban pynurlong ïa ki jingthrang jong ki briew jong ka ri da kaba bud ïa ka Riti Synshar jong ka India.”
U Myntri Rangbah Duh u la ong ba ka jingbahkhlieh jong ka Sorkar ka la kiew lai shah namar ki briew ki la jied ïa kane ka Sorkar la lai sien. U la kular ïa ki briew jong ka ri ba ha kane ka samoi kaba lai, ka Sorkar kan trei shitom lai shah bad pynurlong lai shah ki jingseisoh.
Da kaba kdew sha ki jingkhmih lynti jong ki briew ha kaba ïadei bad ki MP ba thymmai, u Myntri Rangbah Duh u la kyntu ïa ki MP ba kin pyndonkam ïa kane ka lad na ka bynta ka bha ka miat jong ki briew bad ka jingai jingshakri ïa ki briew bad ruh ba kin shim lut ïa ki sienjam na ka bynta ka bha ka miat jong ki briew.
Ha ka jingkren shaphang ka liang pyrshah, u Myntri Rangbah Duh u la ong ba ki paidbah ki khmih lynti ïa ka liang pyrshah ba kan trei borbah da kaba bat ruh ïa ka burom jong ka synshar paidbah. “Nga khmih lynti ba ka liang pyrshah kan leh ïa kane,” u la bynrap. U Myntri Rangbah Duh u la ong ba ki briew ki kwah ïa ki kam kiba shisha ym ki jingpyrta bad u la ong ba u ngeit skhem ba ki MP kin pynurlong ïa kine ki jingthrang jong ki briew.
U Myntri Rangbah Duh u la ban jur halor ka jingbah khlieh jong man ki MP ban ïatreilang ban pynurlong ïa ka jingthmu ban tei ïa ka India kaba la kiew shaphrang bad khlaiñ ka jingshaniah jong ki briew. U la ong ba ka jinglait haduh 25 klur ngut ki briew na ka jingduk tasam ka wanrah ïa ka jingngeit kaba thymmai ba ka India shen kan lah ban pynduh jait ïa ka jingduk.
“Ki briew jong ka ri jong ngi, 140 klur ngut ki nongshong shnong, kim ju randien na ka jingtrei shitom. Ngi dei ban plie lad ïa ki katba lah,” la ong u Myntri Rangbah Duh.
U la ong ba kane ka Ïing Dorbar Thaw Aiñ kan long ka jaka jong ki jingkut jingmut bad ba ka 18th Lok Sabha kan pynurlong ïa ki jingthrang jong ki briew jong ka India. U Myntri Rangbah Duh u la pynkut ïa ka jingkren da kaba kitbok kitrwiang ïa ki MP bad da kaba kyntu ïa ki ba kin pyndep ïa ka kamram jong ki da ka jingskhem jingmut.
