Mawkyrwat, ‘Naitung, 27: U Bah Carness Sohshang, MDC jong ka Mawkyrwat Constituency ha ka jingkren jong u kum u kongsan ha ka jingrakhe ïa ka Ujjwal Bharat Ujjwal Bhavishya @ 2047 ha South West Khasi Hills District, u la pynkynmaw ba ka ri India jong ngi ka la kiew ha baroh ki liang bad ha ka liang ka jingdon jong ka bording ka la lah ban pynïoh bording haduh kumba 99% bad ka duna tang kumba 1% ei ei bad la khmih lynti ba shen ynsa lah ban pynurlong ïa ka jingthmu hapoh ka snem 2047.
U la ong ruh ba ka bording ka la kylla long kawei na kiba donkam tam ha ka jingim kaba manla ka sngi. Haba pynkynmaw ba kum ka ri ka la jan dap ha ka liang ka jingpynmih bording, hynrei ki dang don ki jingduna bad ki jingbym bit bym biang hangne hangtai ha kaba ïadei bad kane ka distrik da kaba kyrpad ïa ka ophis ba dei peit ban ïaleh ban pynbit pynbiang ïa kine ki jingduna khnang ba kan ym buh jingeh ïa u paidbah nangne shakhmat bad ban lait na ka jingmynsaw bad ki jingjia kiba sngewsih. Shuh shuh u la wer ïa ki paid nongshong shnong ban ïa shimkhia ha kaba ai ïa ka jingïatreilang na ka bynta ka bha ka miat bad ka jingbit jingbiang jong ki shnong ki thaw.
Lah ban kdew ba kane ka prokram ka dei ruh kum shibynta jong ka jingrakhe ïa ka Azadi Amrit Ka Mahotsav ha kaba ka ophis jong u Deputy Commissioner South West Khasi Hills District, Mawkyrwat ryngkat ka jingïatreilang bad ka ophis jong u Executuve Engineer, South West Khasi Hills Distribution Division MePDCL Mawkyrwat ki la rakhe ïa ka Ujjwal Bharat Ujjwal Bhavishya @ 2047 ha Hall jong ka Nativity Higher Secondary School, Mawkyrwat.
Haba maitphang halor kane ka jingrakhe u bah K.K. Raswai uba long u Executive Engineer ka MePDCL, Mawkyrwat u la ong ba la rakhe ïa kane ka sngi ban pyni ïa ka jingjop ha ka jingtreikam naduh u snem 2012-13 lyngba ki skhim bapher na ka sorkar India na ka bynta ban pynïoh bording ïa ki nongshong shnong kiba ha ki shnong nongkyndong, ban tan bording na ki wah bad ban ring bording ha ki longïing baduk lane ki BPL families. Shuh u la ong ba lyngba ka Saubhagya Scheme ka skhim kaba pynïoh bording ha man la ki longïing bad ki shnong la mang haduh kumba 2211 tylli ki shnong na ka bynta ban ai konekshon hynrei la pynduna ïa ka skhim sha ka 1512 tylli ki shnong bad ynsa pyndep lyngba ka Revamp Distribution Sector Scheme.
U la ïathuh ruh ba lada kano kano ka ri kaba pynmih bun ïa ka power energy kata ka ri ka kiew ha ka ïoh ka kot. Shuh shuh u la ïathuh ba ka jingpyndonkam bording ha u snem 1996 ha ka jylla jong ngi ka long tang 185 Mega Watt katba ka jingdonkam bording ha ki por kiba mynta ka la kot sha ka 600 Mega Watt bad tang kumba 356.2 Mega watt la pynmih na ka jylla katba ïa kaba tam pat hap thied nabar. U la ïathuh ba ka jingpyndonkam bording ha Mawkyrwat ka la poi sha ka 18 lak unit ha ka shibnai ha ka jinglut kaba 72 lak tyngka shi bnai lada kheiñ ha ka dor 4 tyngka shi Unit bad lada khein ïa ka bai light ba ïoh lum pat na u paidbah kan poi tang kumba 43,97,907 (saw phew lai lak khyndai phew hynñiew hajar khyndai spah hynñiew) tyngka ha ka shi bnai bad ka MePDCL ka duhnong haduh 28 lak ei ei. Namarkata, u la wer la khot ïa ki paid nongshong shnong ban ïa siew thikna ïa ka bai light khnang ban lah ban pynmih na ka bynta ka jingdonkam.
Ka kong Caramai Kharkongngor, IAS kaba long ka Deputy Commissioner, South West Khasi Hills District ka la ong ba naduh u snem 1960 ka policy jong ka sorkar ka long ban pynïoh bording ha manla ki shnong bad namar kane ka sorkar ka la pynlut bun na ka bynta ban ring bording lyngba ka Saubhagya ka skhim kaba pynïoh bording ïa ki shnong bad ïa manla ka longïing khnang ban weng ïa ki jingeh bad ban pynsuk ïa u paidbah. Namarkata, ka dei ka kamram jong ngi kum ki nongshong shnong ban siew ïa kaei kaba ngi la pyndonkam.
Shuh shuh ka la ong ba ha kane ka juk teknoloji kaba mynta ha kaba ka jingpyndonkam ïa ka lait ka la long salonsar yn nym don kiba lah ban im khlem ka lait namar ka la long shibynta kum ka jingdonkam kaba ha khmat eh ha ka jingim jongngi. Kumta, kum ki nongshong shnong ki dei ban sngewthuh ban ym pyndonkam bakla bad ban pyndep ïa kaei kaba ki dei ban siew.
Ha kajuh ka por la pynbna ba nangne shakhmat yn pyndonkam noh da u Smart Meter.
U P. Bhattacharya, Deputy General Manager, Power Grid, Shillong ruh u la kren ha kane ka sngi. U bah B. Kharlyngdoh uwei na kiba la ïoh jingmyntoi u la ïathuh ba u la ïoh jingmyntoi bha na kane ka skhim ha kaba kumba 600 tylli ki longïing ki la ïoh konekshon bad kumba 2000 ei ei ki nongïoh bynta.
La ïoh ruh ïa ka jingpyni phlim halor ki projek jong ka sorkar India kum ka Village Electrification bad Household Connections bad ki skhim ki ban dang wan.
U bah W. Biam, ADC u la pynïaid ïa kane ka jingïalang, u bah R.R. Lyngkhoi, Myntri ka Shnong Mawkyrwat u la ai ïa ki kyntien pdiang sngewbha katba u bah G.S.War, Assistant Executive Engineer u la pyllait da ki kyntien khublei.
