Ka Ri Bhoi kum ka Aspirational District ka don hok ban ïoh ïa ka Medical College

Shillong, Naitung 01 : Da ka thong ba ka Ri Bhoi District kan ïoh la ka jong ka jaka pule doktor lane ka Medical College, na ka liang u MLA ka Nongpoh Bah Mayrallborn Syiem ha ka sngi Nyngkong u la ïathuh ba ka thaiñ ka dang donkam bun bha ban kot sha ka thong ba la buh da ka NITI Ayog jong ka sorkar India.
Haba kren bad ki lad pathai khubor hadien ka jingïalang bad ki heh ka tnad ka Koit ka Khiah, u Bah Mayralborn ba dei ruh u Chairman ka Meghalaya State Health Advisory Board, u la pyntip ba katkum ki kyndon jong ka Niti Ayog ka buh pyrkhing bha ïa ki kyndon ban ïoh ïa ka Medical College.
“Kano kano ka District Hospital ka dei ban don ym duna ïa ka 200 – 250 jingthiah. Hynrei haduh mynta ha Nongpoh Civil Hospital ngim pat don, ngi don tang ka Hospital ba 100 jingthiah,” u la ong.
Shuh shuh u la ong ba kum ka Aspirational District ha ka Ri, ki don ka hok ban ïoh ïa ka hynrei kim pat lah pat ban kot ïa ki kyndon ba la buh. Kumta u la ong ba nangne shakhmat ki donkam ban pynbiang shwa nalade bad hadien kata kin sa lah ban dawa ïa ka Medical College.
“Ngim shong kli kti halor kane bad dei na kane ka daw ba nga sa ïathuh ba ngi donkam ban pynheh ïa ka Hospital ban ïoh kham bun ki jingthiah nalor ba ngi donkam ruh ban pynkynriah noh sha kawei pat ki jaka ïa ki jaka sah kiba don mynta,” u la bynrap biang.
Nalorkata, u la ïathuh ba u la dep kyrpad ïa ki Khlieh Nongsynshar bad ki nongïalam shnong ban ai sngewbha ïa ki jaka khnang ba kin lah ban tei ïa ki jaka sah jong ki nongtrei (residential quarter) bad ruh ban lah pynbun ïa ka jingdon ki jingthiah ha katei ka hospital.
“Kumta, shisien ba ngi la lah ïa kane, kan ym don jingeh shuh ban don ïa ka Medical College.”
Shwa kane, u Bah Mayral u la ïathuh ba ki la ïakren ruh halor bun ki mat kiba ïadei bad ka jingpynbha ïa ki jaka sumar ha ka constituency khamtam ban kyntiew kyrdan ïa ki sub centre kum ka Umshaken Sub Centre sha ka PHC bad ruh ban wanrah khambun ki jaka sumar ha ka thaiñ.
Shuh shuh u la ïathuh ba ki la ïakren ruh halor kiba bun ki jingduna kiba don ha Nongpoh Hospital khamtam halor ki jingujor kiba bun kiba ju wan na ki paidbah.
U la ïathuh ba la ïa kren ruh ban pynbiang noh ïa ki tiar ai jingsumar kiba biang kum ki CT Scan, ki dialysis centre bad ban pynbiang ïa ki ultra sound. Nangta ban don ruh ïa ki jaka sumar ba paka na bynta ki longkmie ba armet bad ba wan kha khunlung.