Ka Ri-Bhoi District ka don hapdeng ka jingma kaba khraw ba jur kiba kyrni drok, ki khun samla ki dei ban long adkar: DSWO

Nongpoh, Nailar 14: Ka kong E Kharshandi kaba dei ka District Social Welfare Officer (DSWO), Ri-Bhoi District haba kren haka prokram ai jinghikai ïaki khynnah skul ka RBP Higher Secondary School, halor ka jingma u drok kala pynpaw baka Ri-Bhoi District kadei kawei napdeng ki 4 tylli ki district kaba don hapdeng ka jingma kaba khraw naka jingjur kiba kyrni drok kaba dei ruh ka khyrdop ba u drok u ioh ban rung bad mih naka jylla namar lyngba kane ka district ka long ka lynti ban pynpoi sha kiwei kiwei ki district haka jylla.
“Ngi dei ban long ki ba addkar hala ka jingim bad ngi dei ban peit pyrman hapoh ka imlang ka sahlang ba ngim dei ban ailad ïa u drok ba un ioh bsuh ha ka jingim jong ki khun samla, namar ba u drok un pynjot ïaka jingim briew khamtam ki khun samla ba lui lui, ïaka iing ka sem bad kum juh ïaka imlang ka sahlang, “ong ka kong E Kharshandi”.
Kala ong ruh ba u drok bad ki jingdih buaid kila kynrei bha ha kylleng ki jaka wat sha ki thaiñ nongkyndong bala pynngop ruh ïa kiba bun ki khun samla kiba la sdang ban kyrni ïa ki jingdih buaid bad ktah ïaka jingmut jingpyrkhat jong ki khynnah kiba sdang pat ban leh shibun ki kam kynsha haka imlang ka sahlang, ha kaba kala kyntu ruh ïaki khynnah skul ha katei ka sngi ba kim dei ban ktah bad ban pyrshang ïa u drok namar sien ba ki la ngop la eh ban bthat ïa u kynjri.
Ha katei ka sngi la ioh ïaka jingkren bad hikai ïaki Khynnah Skul halor katei ka jingma u drok na ki nongkren bapher bapher ki ba kynthup naduh ka Kong V A Hynniewta ADC Ribhoi, kong P L Nonglait, DSEO Ri-bhoi District, Bah W Radu, Principal RBP Hr. Sec. School, bad kiwei kiwei kiba la ban jur halor ka jingdonkam ban rat diengkhong ïa u drok bad ki khun samla kim dei ban ktah bad ban ngop hynrei ban pyrshang pat ban rat diengkhong bad ban hikai ïa kiwei ki khun samla kiba pyrshang ban ngop haki jingdih buaid.
Ha katei ka prokram laioh ruh ban pynsngew iaki sur jingrwai na ki khynnah skul bad ka jingshad. ha kaba kut la ioh ruh iaka jing bam smai jong ki khynnah skul bad ki nonghikai halor ka phang ” ban ong em ïa u Drug” ha kaba la lam khmat da ka kong V A Hynniewta ADC Ribhoi.