Shillong, Lber 22 : Ka Bharatiya Janata Party (BJP) mynta ka sngi Ba Ar ka la rai ba ka jingbishar bniah biang ïa ka Reservation Policy (RP) bad ka Inner Line Permit (ILP) ki long ki ar tylli ki mat ba kongsan ba ka Party kan kynthup ha ka Manifesto jongka na ka bynta ka election MLA 2023.
“ Ka Party ka kyrshan ïa ka jingdawa u MLA jong ngi u bah A.L Hek ban mang 40 % na ka bynta kia duk ba kyrduh ha ka bhah kam” ong u bah Easrnest Mawrie President ka BJP.
U la ong ba ka jingbishar bniah biang ïa ka RP ka dei ka jingdawa kaba la slem bah jong ki paidbah bad kumta ha kane ka kynti yn kynthup ïa kane ka mat ha ka Manifesto ka BJP.
Haba la kylli hato kane ka Policy kam dei tang ka bynta ki Khasi-Jaintia bad Garo, u bah Mawrie u la ong “ Kaba ngi ïakren ka dei ban buh bhah ïa kiba duk ba kyrduh namar haduh mynta hi 80 % na ki nongshong shnong ki dang dei ki paid nongrep bad ki dei ki BPL ne kiba duk ba kyrduh. Kumta ban ïarap bad kyntiew ïa ki bym don lad ne bor kumba don kiba bit ba biang ngi dawa ba dei ban ai bhah kyrpang ïa ki ha ka jingthung kam thung jam bad dei tang kane kaba lah ban weng ïa ki jingeh jongki”.
U la ong ka jingpyntreikam ïa ka ILP ruh kan long kawei na ki mat ba ka BJP kan buh ha ka Manifesto jongka party. “ Haduh mynta ngi ïadon ryngkat beit bad ki paidbah ka jylla namar ngi kwah ba ka jingangnud ki paidbah kan urlong bad kumta ngi ruh ngi ïai dawa na ka sorkar pdeng ban pyntreikam ïa ka ILP ha Meghalaya” ong biang u bah Mawrie.
U la ong ba ki MLA ka BJP ruh ki ïadon bynta ha kaba mynjur ïa ka Resolution hapoh ka ïing Dorbar Thawaiñ ka jylla ha u snem 2019 ban kyntu ïa ka sorkar pdeng ba kan pyntreikam ïa ka ILP ha kane ka jylla Meghalaya.
