Nongstoiñ, Jymmang 29: U sohphlang u dei uwei na ki mar rep ba ki paitbah ha West Khasi Hills bad ki paitbah nongshong shnong ki ïabeh bha ban rep ha ki snem ba mynshuwa hynrei ha kine ki sngi ka jingrep ïa u ka la sdang ban duna bha. Ha ki snem ba mynshuwa ka jingrep sohphlang ka jur bha ha ki thaiñ Parïong, Myrïaw, Markasa, Jaidoh, Nonglwai, Rangblang bad kiwei kiwei.
Katkum ki jingtip ba la ïoh lum da u nongthoh khubor na ki nongrep sohphlang na kylleng ki jaka jong ka West Khasi Hills, la ong ba ki don shibun ki jingeh ha kaba rep ïa utei u jingthung kum ka jingduna ki jaka rep. Namar ban rep ar sien ha kajuh ka jaka um long satia namar u donkam ban rep tang ha ki khyndew shrah. Nangta ka jingmih na ki jaka rep ruh ka la kham duna bha ha kine ki snem. Wat la katta ruh ki dang don ki nongrep ha ki katto katne kiba dang ïabeh ban rep ïa utei u jingthung.
Nalor kata kiba bun ki jaka kiba ki nongrep ki kham ïabeh ban rep sohphlang kum ha ki thaiñ Parïong, Nongshilong, Markasa, Laitkseh, Marngor bad kiwei kiwei ha ka jaka ban rep sohphlang ki la kham ïabeh ban rep noh da u biskot, namar u dei u jingthung u ba kloi bha ban ïoh kheit bad ka jingïoh ruh ka kham bun, nalor ba ka ïew ka hat ka biang bha khamtam ha ki bnai ba dang sdang kheit nyngkong.
Haba ïakren bad ki nongrep biskot pat ki la ong ba ha une u snem u biskot tang mar shu sdang phuh syntiew bad sdang ban soh u neh bha. Hynrei kaba lyngngoh ka long ba na ka jingjur slap palat ha ki taïew ba la dep bad ka jingrang kynsan ha kane ka taïew bad ka jingshit kyrang jong ka sngi, ki don bun bah ki jaka rep biskot kiba ki sla ki la sdang stem khlem pat dei por.
Ki la ong ba imat ka jingpynmih biskot ka lah ban duna bha na ha une u snem, namar um dan san bad pur bha kum ba long ha kiwei ki snem. Wat la katta ruh kiba bun ki nongrep biskot ki la ong ba ki la pyshang ban trei shitom katba lah ban sumar, namar napdeng ki mar rep baroh u biskot u dei uba pynmih pisa bun eh lada ka ïew ka hat ka biang.
