Shillong, Naiwieng 13 : U National President ka NPP ba dei ruh u Myntri Rangbah ka Jylla, Conrad K sangma ha ka sngi Palei u la ong ba ka jingthaw ïa ka Regional Front kan nym ktah satia ïa ka jingïatreilang jong ka seng bad ka National Democratic Alliance (NDA) kaba la ïalam da ka BJP ha ka sorkar pdeng.
“Ngi don beit ka jingïateh lok bad ka NDA, ngi shai bha ïa kane. Wat mynta hi ngi don ïa u Myntri na ka BJP, nangta ka TIPRA Motha ka dei lang ka bynta jong ka sorkar, kumta ka shai bha ïa kata ka bynta”, u la ong haba kren sha ki nongthoh khubor.
Kumban shu kdew hangne, ka dei ha ka 04 tarik u Naiwieng ba u Conrad K Sangma ryngkat bad u nongseng jong ka seng TIPRA u Pradyot Bikam Manikya Deb Barma, u nongïalam barim ka BJP bad u myntri barim ka Nagaland u Mmhonlumo Kikon, u nongseng jong ka People’s Party, u Daniel Langthasa ki la pynbna ïa ka rai jong ki ban thaw ïa ka seng kaba thymmai kaba ïatylli ban mihkhmat ïa ki jingangnud jong ki paidbah ka thain shatei lam-mihngi jong ka ri.
U Conrad u la ong ruh ba ka jingpynïatylli ïa ki seng riewlum ba dang khie ka long da ka thong ban thaw ïa ka rynsan kaba khlain ban weng ia ki jingeh kiba long kyllum kiba ktah ia ka thain.
“Kaei kaba ngi ong ka long ba ngi wan lang ban pynthikna ba ngi don ïa ka rynsan kaba kham khlaiñ ba ngi lah ban shim ïa ki mat. Kane kam dei ka jingïakhun pyrshah ïa uno uno u riew shimet hynrei ka dei tang ka jingsngewthuh ba baroh ngi dei ban ïawan lang ban wanrah ïa ka jingïatylli khnang ba ngin kham khlaiñ kum ka kynhun bad kum ki nongïalam jong ka thaiñ Shatei Lammihngi, kaban plie lad ïa ngi ban ïakren bad kiwei pat ki nongïalam kiba kham halor ha ki sngi ban dang wan,” u la ong.
Haba jubab ïa ki jingsngewkhia ba ym shym la ïoh jingïamir jingmut na baroh ki seng na ka thaiñ—kum kito kiba na Meghalaya, Mizoram bad Arunachal—u Conrad u la batai ba kane ka kam ka dei kaba dang tyllun shakhmat.
“Ka dei ka kam kaba dang ïaid. Kam dei ba ngi la rai mynta ba baroh kin shu wan tang da kaba nion ïa u budam bad baroh kin sa iasoh lang, kam long kumta. Kane kam pat ju jia mynno mynno ruh. Ngi dang sdang ïa ka jingpyntreikam ha kaba katto katne ngut na ngi ngi la rai ban ïawan lang, bad ka jingiamir jingmut ka dang ïaid hapdeng ki party bapher bapher. Kine kin sa rai kumno ban ïaid shakhmat ban ïa syllok bad ruh ban peit mano ba sngewtynnad bad mano ba kwah ban wan shakhmat.”
Shuh shuh u la bynrap, “Ngi la sngewthuh ïa ka jingdonkam ban don kano kano ka jait jingïatylli hapdeng ka thain shatei lammihngi khnang ba ngin don ha ka kyrdan kaba kham khlain ha ka sain pyrthei ban shim ïa ki mat kiba kongsan ïa ngi kum ka thain. Ngi la ïakynduh ïa kiba bun ki jingeh ha ki por ba la leit noh, bad ngi kwah ban ïohi ba kajuh ka jingsngewkhia bad ka sur kan paw. Kumta, ka kynhun ngi thmu ban don kawei ka bor kaba tylli bad kaba kham khlainbor ban rah ïa kane ka mat,” u la bynrap biang.
