Ka Raidmynsaw Upper & Secondary School ka jingkyrkhu kaba khraw ïa ka thaiñ Langpih

Nongstoiñ, Naitung 24 : Ka jingdon jong ka Raidmynsaw Upper & Secondary School ha Langpih ka la long ka jingkhyrkhu bad ka jingmyntoi kaba khraw ïa ki longïing longsem ym tang jong ki Khasi kiba dei ki trai muluk hynrei ïa ki longiing jong ki Nepali baroh kiba don ha katei ka thaiñ.
U bah H.Sangleiñ Secretary jong ka shnong Langpih haba ïakren bad u nongthohkhubor u la ong ba naduh ba ha ki snem ba mynshuwa naduh ba u (L) bah Hindro Samakha u dang long u nongsynshar ka Raidmynsaw u don ka jingthrang bad u da angnud haduh katta katta ban kyntiew ïa ka pule puthi u la lum lang ïa baroh ki sordar shnong bad ki riew rangbah ka thaiñ ha ryngkat ka jingaimynsiem bad shim khia jong u bah K.P.Pangñiang MLA barim ka Rambrai Jyrngam ki la sdang ban pynkhlaiñ ïa ka skul.
U ong ruh ba hapdeng ki jingeh kiba bun namar ka jingpynwit bad pynthut jong ki pulit Assam hynrei kim shym la kynran dien bad ha kaba khatduh ki la ïoh jingïarap na ka sorkar jylla ha ka por jong ka sorkar Meghalaya Progressive Alliance kaba la lam khmat da ka United Democratic Party bad u (L) Dr. Donkupar Roy u dang long kum u Myntri Rangbah ha kato ka por.
U la ong ruh ba naduh ba la ïoh jingïarap ban shna ïa ka ïingskul ba thymmai ki khynnah ki la nang bun bad ka skul ka la nang kiew.Nalor kata u la ong ruh ba ha u snem 2013 u (L) bah Hindro Samakha ryngkat ki riew rangbah ki la shim sa kawei ka sienjam da ha kaba ki la ïakut ban kyntiew kyrdan noh ïa ka Upper Primary school sha ka Secondary School bad da ka jing aimynsiem lang jong u bah K.P.Pangñiang ki la kyntiew kyrdan sha ka Secondary school.
La iathuh ba la sdang nyngkong eh tang na ka klass VIII bad IX bad ïa ka tulop jong ki nonghikai la siew da u synñiang uba mih na ka bai musur kaba lum na ki nongshong dukan ha ïew Langpih man ka sngi Thohdieng lam bad u synñiang ba la lum na ki longïing kiba don ha poh ka Raidmynsaw.
Utei u nongïalam shnong u la ong ruh ba naduh katei ka por ka skul ka la kiew sted bha bad haduh mynta ki khynnah kiba pule ha katei ka skul ki la don palat arspah ngut kynthup lang naduh upper haduh Secondary school. Nalor kata u la ong ba naduh ba ka skul ka la sdang ban plie haduh klass X ki la don bun bha ki khynnah kiba wan shakhmat ha ka Secondary School Leaving Certificate ba la pynlong da ka Meghalaya Board Of School Education (MBOSE) bad ki la don bun bha ki khynnah kiba wan shakhmat bad ïoh distinction ruh bun tylli ki subjek.
La iathuh ba mynta u snem katei ka skul ka la ïoh ban phah lai phew ngut ki khynnah kiba ïaleh ïa ka selection test na ka bynta ban ïoh rung ha ka final jong ka SSLC ba pynlong da ka MBOSE. U bah Sangleiñ u la ong ruh ba kaba sngewtynnad ka long ba ki khynnah Nepali kiba pass ïa ka SSLC Exam na katei ka skul haba ki leit ban bteng ïa ka jingpule jong ki ha ki College ha Assam ki dei kiba wan hakhmat duh ha baroh ki Exam bad kiba poi beit ha ka top list la kadei ha ka Bachelor of Arts (BA), Bachelor of Science (BSc) bad kiwei kiwei.
U la ong ruh ba ka jingkiewbha jong ki khynnah Nepali kiba mih pass SSLC na ka Raidmynsaw Secondary School ka dei namar ba ka standard jong ki skul ha Assam bad ha Meghalaya ka ïapher da ki bun bun shah khamtam eh haba iadei bad ka English.