Ka Rai Snem Thymmai ka dei ban pynbiang ïa ka koit ka khiah sha ki thaiñ Nongkyndong : Wailadmiki

Shillong, Kyllalyngkot 14 : U Myntri ka tnad ka koit ka khiah u Ma Wailadmiki Shylla u la buh thong bad ong ba ka rai Snem Thymmai ka dei ban kyntiew bad pynkhlaiñ ïa ka koit ka khiah ha ki thaiñ Nongkyndong.
“ Ka thong jong nga ka long ba ka koit ka khiah ka dei ban biang lut ha ki thaiñ nongkyndong bad dei ban biang lut ki jaka sumar nadong shadong ym tang ba kin biang ha ki nongbah jong ki District” ong u ma Wailad.
Halor ka thong jongka sorkar ban kyntiew kyrdan noh ïa ki PHC bad CHC u ma Shylla u la ong “ Ngi la dep leh na ka bynta ki katto katne bad ngi la thaw sa kawei ka kyrdan kata ka PHC Plus khnang ba yn lah ban pynbun shuh shuh ïa ki jingthiah bad kumjuh ruh ïa ki Nurse bad ki Doctor”.
U la ïathuh ka jingpynkhreh ban kyntiew kyrdan ka dang ïaid wat lada don hapdeng ka jingduna pisa ruh. Namar ki PHC Plus Model ki dei kum ki jingkieng ban pun hapdeng ki PHC bad ki CHC kaba mut ki kham halor ïa ki PHC bad lajan ïa ryngkat kyrdan hi bad ki CHC.