Shillong, Nailur 3 : U National Executive Member jongka BJP bad MLA ka Pynthorumkhrah u bah A.L Hek ula ong ba ka mat pynkynriah ïaki Harijan na Them Iew Mawlong ka la long kum ka jingïalehkai ïaknieh shuki.
Kane ka la long kum ka jingïalehkai ïaknieh shuki namar ka sorkar kam pat lah ban shim ïaka rai kaba skhem halor kane ka kam. Shiphang ki ong da kumne shphang da kumtai, ki don bun ki jaka ba lah ban pynkynriah ïa ki hynrei ka sorkar kam lah ban shim ïa ka rai kaba biang, ong ubah Hek.
U la kyntu ïaka sorkar ba ka dei ban shim khia bha ïa kane ka kam namar kitei ruh ki dei ki briew hi. Ym lah ban ñiew ïa ki da kumne kumtai. U la ong katno sien ka sorkar ka la rai ban pynkynriah ïa ki Harijan na kawei ka jaka sha kawei pat. U la ong ka sorkar ka dei ban shim da ka rai kaba shai kdar khnang ba kitei ki briew ruh kin ym sah ha ka jingpisa bad lynga ka mynsiem.
Kane kam dei ka kam ïaleh khun jakai ka sorkar ka dei ban shim ïa ka rai kaba thikkna bad skhem, ong u bah Hek.
