Anfield, Kyllalyngkot 27: U bak jong ka Liverpool-u Virgil van Dijk u la pynpaw ba ka rai jong u Jurgen Klopp ban iehnoh ïa ka kam kum u manager ka Liverpool ha kaba kut jong ka samoi “ka long kaba eh bad jway ban pdiang”.
ïa kane ka rai, la pynbna da u tei u manager ri Germany-u Klopp ha ka sngi Thohdieng, da kaba ong ba un sa iehnoh ïa ka kam ha u Naitung.
U la dep ban pyntip sha ka klob halor kane ka jingthmu naduh u Naiwieng hynrei ki player ki la ïoh jingtip dang hynnin ka Sngi Thohdieng ba la pynbna paidbah.
“U ne u manager u long u ba kyrpang na bynta jong ngi, bad ruh ïa ka klob,” la ong u tei u kapten jong ka kynhun-Van Dijk.
“Hynrei u shim ïa kane ka rai na bynta lada bad ruh ïa ka ïing ka sem ka jong u.
“U la ïathuh ïa ngi. Ka long kaba eh ban pdiang hynrei ngi hap ban phaikhmat ha ki jingïakhun. Ngi dang don shibun ki thong kiba ngi hap ban ïaid, bad nga pyrkhat lehse ngin pynkut ïa kane ka samoi ryngkat bad ki khusnam ba ngin lehkmen lang bad u manager u ban sa mih noh?”
Kumban shu pynkynmaw, u Van Dijk u la ïasoh bad ka Liverpool lyngba u Klopp- ha ka samoi ba lai kum u manager bad jop ruh hynriew tylli ki trophy bad u tei u manager ba la don 56-snem.
Ka Liverpool ka dang don mynta ha baroh saw tylli ki lympung ïakhun, bad ruh kan sa ïakhun ïa ka final jong ka Carabao Cup pyrshah ïa ka Chelsea ka ban long ha Wembly Stadium hadien ba ka la lah ban pynliem ïa ka Fulham ha ka jingïakhun semi final.
