Ka pyrthei ïa ap ïa ka jingnoh synñiang jong phi – pynshlur u SDO EJH ïa ki khynnah

Khliehriat, Risaw 09 : Ka ophis jong ka District Hub of Empowerment of Women East Jaiñtia Hills District, mynta ka sngi ka la rakhe ïa ka sngi kyrpang jong ki khynnah kynthei, ka International Day of the Girl Child’, u SDO ka East Jaiñtia Hills, u Aditya Verma, IAS kum u kongsan u la ai mynsiem bad pynshlur ïa ki khynnah kynthei bad kumjuh ruh ïa ki khynnah shynrang kiba la wan sha kane ka prokram.
U Aditya Verma, IAS u la kyntu bad pynshlur ïa ki khynnah ba ki dei ban don ka jingkutjingmut kaba skhem bad ban don ruh ka thong bad ruh ban shimkhia bad treishitom ban poi sha ka thong ha ka jingim la ka dei ha kano kano ka sap ka phong kaba ki don bad ym dei ban shu pynsepei kai ïa ka por, u la bynrap ruh da kaba ong “Ka pyrthei ka ap ïa ka jingnoh syniang jong phi, phi donkam ban tur shaphrang bad shim ïa ki lad ki lynti, ym don mano mano ban wan ban ai ha phi kano kano ka lad hynrei phi hap ban thaw hi hala ka jong ka jong ka jinglah ne ka sap ba phi don, la phi don ka sap ha ka ialehkai footbal, designer, scientist ne kano kano ka sap dei ban don ka rai kaba skhem bad ka jingtrei shitom, mynta phi dang dei ki khynnah phi dang khlaiñ ka bor, shisha nga kwah ba phin don kata ka jingkitkhlieh da lade hi, phi dei ban long kiba la pynkhreh ialade, ïa kane nga kren kyllum ïa ki khynnah kynthei kumjuh ruh ïa ki khynnah shynrang”
U Muktiar jong ka Khliehriat Bar Association, u bah Wandajop Sympli u la pynpaw ka jingsngew khia halor ka jingbym kheiñ lang kat juh ïa ki kynthei bad shynrang ha ka imlang ka sahlang u la ong ba “ bunsien ngi ju pyrkhat ba dei tang ki shynrang kiba dei ban kiew ha kiei kiei baroh, ki kynthei ki don bun shisha ki jingeh kaba ki lah pat ban iakhun pyrshah lada ong ba ki kynthei kim don kajuh bad ki shynrang ka long ka bym lah ban pdiang” u la bynrap ba kane ka jingsngew shiliang khmat ka dei na ka daw ka jingduna ka jingpynshai lane ka awareness ban pynsngew thuh ba ki kynthei bad ki shynrang ki long kut juh, lada ka imlang ka sahlang ka pdiang ba ki kynthei bad ki shynrang ki long kat juh ne equality kane kan iarap ban pynduna ïa ki kam thom bor ïa ki kynthei, u la ong ba bunsien hi ha ka imlang ka sahlang ki ju shim ba ki kynthei ki dei tang ban trei ïa ki kam ïing ha sem, ha ka sait ka khlieng bad ha ki kam iing hynrei ha ka jingshisha kam dei ban long kumta, dei ban long kutjuh la ki dei ki kynthei ne shynrang.
U bah Wanjop u la ong ruh ba katkum ka riri synshar ri ka ri India ha ka article 14 ka kren shaphang ka jingialong katjuh, ha ka article 15 ka kren shaphang ka jingbym dei ban peit i beiñ ïa kano kano ka kam ha kaba ki kynthei bad shynrang ki lah ban trei kumjuh hi.
U Adolescent Health Counsellor Khliehriat Hospital, u bah Pynhunlang Rymbai, u la ong ba ïa kane ka sngi kyrpang na ka bynta ki khynnah kynthei, ka International Day of the Girl Child’ la ju rakhe man la u snem ha ka 9 tarik u bnai risaw bad u la kren ruh halor ka phang pdeng ba la buh “Girl Vision for the future’ (Ka jingiohi jngai ki khynnah kynthei na ka bynta ka lawei), u la ong ba ha kaba kum kane ka sngi la sngew dei ban pyn phalang jingmut ban kyntiew lyngba ka BBBP Skim bad kane ka skim ka buh thong ha kaba kyntiew ia ki khynnah kynthei ha ka sex ratio , ban pyntikna ia ka jinglong katjuh hapdeng ki kynthei bad ki shynrang (Gender Equality and Woman Empowerment, ka ban iada ruh ïa ki kynthei kaba tip kum ka Prevent Gender-Biased, Sex Selective Elimination, ban ai ka jingnang jingstad ïa ki khun kynthei bad ba kin lah ruh ban ïa shim bynta ha kino kino ki rynsan bad kiwei kiwei ki lad jingiada bad jingpynkup bor ïa ki kynthei.
Kiba la ai jingkren ki kynthup ruh ka District Child Protection Officer East Jaiñtia Hills District, ka kong R.Kynjing, ka District Social Officer Khliehriat, ka kong Rica Bareh, kiba la kren shaphang ka jingdonkam ban ïa long katjuh hapdeng ki kynthei bad ki shynrang ym ban peit shiliang khmat watla ki dei ki khun kynthei, hynrei dei ban sngewthuh ïa ka jinglong katjuh hapdeng ki kynthei bad ki shynrang, ïa ka prokram la pyniaid da ka kong Joymerciful Darnei kaba la ai ruh ïa ka jing kren ai khublei.
Ha kane ka sngi la sam ruh ïa ki prize sha ki khynnah kiba jop ha ka jingiakop dro dur, ha ki jingthoh slogant bad thoh essay bad kiba jop ha ka jingialehkai football.
Ki khynnah kiba jop ha ka jingiakop dro dur ki kynthup ka Nafia Begom, ka Alpana Paul, ka Sushmita Paul, ka Shakshi Paul kiba na ka skul Ambrose Memorial Secondary School bad ka Fairly Lamurong kaba na ka skul Khliehriat Higher Secondary School.
Kiba jop ha ka jingiakop thoh slogant pat ki kynthup ka Pabni Paul, ka Dakini Bareh. Ka Darilin Muksor kiba na ka skul Ambrose School Khliehriat bad ka Caerenza Sympli bad ka Wansakini Gympad kiba na ka skul Khliehriat Higher Secondary School.
Kiba la jop ha ka jingiakop thoh essay ki kynthup ka Baphindarisha Dkhar kaba na Khliehriat Higher Secondary School, ka Tumpa Nath, na Ambrosr School, ka Nafibantei Dkhar, ka Lumhokmika Talang, na ka skul Khatsoo Ripnar School, ka Deborah Phawa, kiba na ka skul na ka skul Khatsoo Ripnar School.
La sam ruh ïa ka prize sha ka kynhun kaba jop ha ka jingialehkai football sha ka Youth Organisation na Tluh bad sha ka Women Village Organisation.