Nongstoiñ, Ïaiong 6: Ka St Anthony’s Secondary School Jaidoh Nongstoiñ West Khasi Hills District, kum shi bynta ban pynïar shuh shuh ïa ki class na ka bynta ki khynnah kiba la kham san jong katei ka skul, ha ka sngi ba ar jong ka taiew ka la ïoh ban buh ïa u maw nongrim na ka bynta ka Higher Secondary.
Ïa utei u maw nongrim la wan ban plie da ka Mother General ka Rev. Sr. Clara Vasanthi Congregation Society of Sisters of St Anne Madras, ha ryngkat ka jingïasynranlang u Lyngdoh Wilbert Marweiñ Parish Priest ka Nonbah Parish Nongstoiñ, u bah Gabriel Wahlang MDC ka Nongstoiñ konstitwensi, kong Lata Syiemlieh DSEO WKHD, Sr. Amala Sabrina Headmistress ka St.Anthony Secondary School Jaidoh, Sr. Esther I ba de I Superior, ki riew rangbah jong ka thaiñ kiba kynthup ïa ki rangbah shnong, ki rangbah balang bad kiwei kiwei.
La ong ba ïa katei ka ïing skul thymmai kaba dei na ka bynta ka Higher Secondary, yn bei pisa da katei ka kynhun jong kitei ki sister kaba la tip kum ka Congregation Society of Sisters of St Anne Madras.
Ïa ka jingïalang plie la pynlong ha phyllaw jong katei ka skul bad kum shi bynta ban pynshit pynshngaiñ shuh shuh ïa katei ka jingïalang, la ïoh ruh ïa ki jingshad na ki khynnah jong katei ka skul, la sakhi lang ïa katei ka sngi da ki khynnah skul bad ki kmie ki kpa jong ki khynnah jong katei ka skul bad kiwei kiwei.
Ka Mother General Rev Sr Clara Vasanthi Congregation Society of Sisters of St Anne Madras, haba ai jingkren ha katei ka sngi, ka la ong ba kane ka dei ka sngi jong ka jingjop na ka bynta ka thaiñ hi baroh kawei, khamtam na ka bynta ka shnong Jaidoh ban long kum ka jingkyrmen ban ap khmih lynti ïa u soh.
U Bah Gabriel Wahlang MDC, u la ong kane ka jingwan jong I kan long ka jingkyrkhu kaba khraw ïa ka thaiñ, khamtam ïa ki nongshong shnong jong ka shnong Jaidoh, ba kin lait na ka ban leit pule sha sor Nongstoiñ ne sha sor Shillong, ha kaba ki kmie ki kpa kin hap ban mad ïa ki jingeh kiba har rukom, namar ka jinglut kan long kaba kham heh. Hynrei lada u soh un ih na kane ka jingthung ïa une u dieng, kan long shisha ka jingïohnong ïa ngi ki nongkyndong, u la ong.
