Ki jingdon jingem ha kaba ïadei bad ka um kaba don hapoh khyndew ki long kum u budlum jong ki kam rep ka India bad ki long kiba donkam bha ban pyndap ïa ka jingdonkam um dih jong ki 1.35 billion ngut ki briew ka ri. Ka dei ka spah ba buhrieh hapoh ki sla kjat jong ngi kaba ngim lah ban ïohi hynrei kaba long kaba donkam bha ha ka jingim jong ngi. Ka India ka long kawei na ki ri kaba kjit bun eh ïa ka um kaba don hapoh khyndew. Katba dang bun ki briew ha ka ri bad ka ban pyndap ïa ka jingdonkam um, ka jingkjit bad jingkhlong ban ïoh ïa kane ka um kaba don hapoh khyndew ha kine ki snem ba la dep ka la ktah bha ïa ki kam um ha ki bynta bapher bapher jong ka ri. Kane ka la ïalam sha ka jingpyndonkam khlem pud bad ka jingduna jong kane ka um kaba don hapoh khyndew. Ka jinglong jingman jong ka um kaba don hapoh khyndew ha katto katne ki thain ka la kham shem jingeh shuh shuh namar ka jingjaboh anthropogenic. Hynrei, wat la kata, ki don katto katne ki thain ki bym pat da pyndonkam bha ïa ka um kaba don hapoh khyndew bad ki don lad ban leh ïa kane. Kane ka la pynlong ba ka jingpeit ïa kane ka kam ka long kaba kyrpang bad kaba donkam ïa ki sienjam da kaba peit shuwa ïa ki jinglong jingman.
Kumta, ka working group na ka bynta ka XII plan halor ka ‘Sustainable Ground Water Management’ ka la kdew sha ka jingdonkam ïa ka jingshna ïa ki map shaphang ki acquifier ha India lane ki jinglong jingman ha kaba ïadei bad ka um kaba don hapoh khyndew ka ban long ka nongrim jong kano kano ka kam ban peit ïa ki kam kiba ïadei bad kane ka um. Shuh shuh, la shim ïa ki sienjam katkum ka jingstad science ban kyntiew ïa ki kam kiba ïadei bad ka um kaba don hapoh khyndew hapoh ki jinglong jingman bapher bapher khnang ban wanrah ïa ki rukom treikam kiba biang ha ryngkat ka jingïadon kti lang ka shnong ka thaw khnang ban kham lah ban peit kham bha ïa kane ka kam. Hadien kane, ka tnat Water Resources (Kaba long ka tnat Jal Shakti mynta) ka la sdang ïa ka prokram National Aquifer Mapping and Management (NAQUIM) ha u snem 2012. Ka NAQUIM ka dei ka prokram kaba heh tam ha ka pyrthei kaba peit ïa ka jingpynïaid ïa ki aquifer, ban kyrshan ïa ka jingpeit ïa ki jingdon jingem kiba ïadei bad ka um kaba don hapoh khyndew ha ka ri. Kane ka peit bniah ïa ka jingphiah ïa ki aquifer katkum ka jingstad science, ka jingshna map ïa ki, bad ki jingwad bniah ban sngewthuh ïa ka jingdon bad ki rukom kyntiew ïa ki rukom treikam ban peit ïa ka jingpynïaid ïa kane ka um. Kane ka kam ban map lane ban ithuh ïa ki tyllong um kan plié lad ïa ki jingpynkhreh kiba ïadei bad ka rukom pyndonkam ïa kane ka um ha ka rukom kaba ïahap, bad ka jingsaindur ïa ka rukom pyndonkam ïa kane ka um kaba dei trai lang baroh.
Ka NAQUIM ka dei ka prokram kaba kyrpang na ka bynta ka jingpeit ïa ki tyllong um ne ki tyllong um ha kaba la lum shibun ki jingtip bad la pyndonkam ïa kine. Ki model 3-D jong ki aquaifer ba la saindur da ka NAQUIM da kaba buh nongrim ha ki jingwad bniah ki ai jingtip shuh shuh na ka bynta ka jingsngewthuh kaba kham bha shaphang ka um kaba don hapoh khyndew. Ki Aquifer map bad ki jingpynkhreh ban pynïaid ïa kane ba la wanrah hapoh kane ka prokram ki dei kiba ïoh jingkyrshan na ki survey ba la leh da ki hydrogeologist kiba la tbit jong ka Central Ground Water Board. Ha ryngkat kane, la bud ruh ïa ki survey geological, geophysical, hydrological bad kiwei kiwei ban pynkhreh ïa kine ki aquifer map. Ka kamram jong ka NAQUIM kam dei tang ban shna map hynrei ka dei ruh ka jingwanrah ïa ka rukom peit ïa ka um kaba don hapoh khyndew ha ryngkat ka jingïatrei lang bad ka shnong ka thaw. Ki jingpynkhreh ki hap ïaid lyngba ka jingpeit bniah kaba lai kyrdan kaba kynthup ïa ka jingpeit bniah da ka National Level Expert Committee (NLEC) shuwa ban pynskhem ïa ki. Ha ki jaka kiba lah ban pynthymmai, lah ban shna ïa ki jingdon jingem ban lum ïa ka um kumba la kdew ha kane ka jingpynkhreh. Ha ki 33 lakh km2 jong ka ri, kumba 25 lakh km2 ka dei kaba la ithuh kum kata kaba hap hapoh ki bynta bapher bapher jong ka prokram NAQUIM. Palat 88% jong ka jaka ba lah ban shna map ka dei kaba la hap lypa hapoh ka prokram shna map ïa ki tyllong um bad ïa kaba sah yn pyndep shuwa u Lber 2023. Kane ka prokram ka buh ïa ka nongrim ïa ka imlang sahlang ba kan pynïaid ïa ka jingpyndonkam ïa kane ka um kaba don hapoh khyndew katkum ka jingstad science bad ha ka rukom kaba don jingbahkhlieh. Ban plié lad ïa ka jingpynsaphriang ïa ki jinglap ka NAQUIM, la ïasam ïa kine na ka por sha ka por bad ki Sorkar jylla. Shuh shuh ban ai jingtip sha ki briew, la pynlong ïa ki Public Interaction Programme (PIP) ha ki jaka bapher bapher jong ka ri ha kaba kito kiba ïadon bynta ha kane ka kam ki ïashim bynta. Kumjuh, hapoh ka Rajiv Gandhi National Ground Water Training and Research Institute, Raipur, la ai jinghikai block level (tier III) ha kaba la ai jingbatai shaphang ki kam kiba ïadei bad ka um kaba don hapoh khyndew sha kito kiba pyndonkam ïa ka.
Ki jingwad bniah ba la pyndep haduh mynta ki la wanrah shuh shuh ïa ki jingshai shaphang ki jinglong jingman jong ka um kaba don hapoh khyndew bad ki rukom pynïaid ïa kane. Ki sienjam kiba don nongrim ha kine ki jingshem kiba kynthup ruh ïa ki jingdonkam bad ki jingpynbiang um ki dei kiba la ai jingmut ban tehlakam ïa ka jingpyndonkam palat pud ïa ki aquifer. La ithuh ïa ki aquifer kiba lait na ki jingpynjaboh ha ki jaka bapher bapher ha kaba ki don ruh ki jingpynjaboh ba la shem. Kine ki jingwad bniah ki pyni ba lah ban pynthymmai ïa ki tyllong um kiba heh ka ban kyntiew ïa ka jingdon ka um hapoh khyndew na ka bynta ki kam rep. Katba ka jingkyntiew ïa kine ki jingpynthymmai ka la dei ka atiar kaba khraw ha ka jingpynïaid ïa ka um ba don hapoh khyndew ha ka ri, ki jingwad bniah ka NAQUIM ki la pyni ïa ka jingpeit ïa ki jingdonkam kaba ktah bha ïa ka kam ba kyntiew ïa ka um kaba don hapoh khyndew.
Ki jingshem ka NAQUIM ki wanrah shuh shuh ïa ka jingshai ha ka jingsngewthuh ïa ka jingdon ka um hapoh khyndew, kumno ki lad pynmih um ki pur hapoh ka sla khyndew, ka jingkhein ïa ka jinglah bat ki jait maw bapher bapher ïa ka um bad ka jingsngewthuh ïa ka jingkhuid jong ka um kaba don hapoh khyndew ha ki jaka bapher bapher.
Namar ka jinglong jong ka kam, ka NAQUIM kan ïarap ban wanrah jingshngaiñ ha ka jingdon um dih, ki lad ai um kiba kham biang ha ki jaka rep bad ka jinglah kyrshan ïa ka kam ban kyntiew ïa ki jaka shong um ha ki jaka nongkyndong ka ri bad ruh ha ki jaka sor. Ha kane ka rukom, ka prokram NAQUIM ka thmu ban pynkylla ïa ki kam kiba ïadei bad ka um kaba don hapoh khyndew bad kan ïarap ban pynurlong ïa ki thong jong ka jingpynïaid ïa ka um kaba don hapoh khyndew da kaba wanrah ïa ki jingtip kiba bniah shaphang kane ka um kaba don ha India.
Subodh Yadav,IAS, Joint Secretary, DoWR, RD & GR
Jal Shakti Mininstry, Govt. of India
