Ka projek DREAM ka la ai jingmyntoi shibun bha ïa ka jylla, ong u Myntri Social Welfare

Shillong, K’ Lyngkot 02: U Myntri ka tnat Social Welfare ka sorkar jylla u Bah Paul Lyngdoh u la ong ba ki jingmyntoi bad ki jingmih kiba bha ba la wanrah da ka sorkar ïa ka Drug Reduction Elimination & Action Mission (DREAM) ka la pynmyntoi shibun ïa ka jylla.
“Kumba long mynta, ka dei ka sien kaba nyngkong naduh ba la ïoh ïa ka jylla Meghalaya ba mynta ngi don ka kynhun ki pulit kaba aiti met bad mynsiem ba la khlieh da u SP kaba don ruh ïa ka ophis la ka jong, bad ki tiar ki tar bad technology,” ong u Bah Lyngdoh sha ki lad pathai khubor.
“U Mission Director jong ngi uba khmih ïa ka DREAM u la long uba ïatreilang bad u la leit ruh sha kiwei pat ki bynta jong ka ri bad u la ïalam ïa ki heh ophisar jong ka DREAM ban ïasyllok bad kito ki jylla bad ban shemphang na ki bad kumjuh ruh ha ka sien kaba nyngkong ha kiba bun ki snem, ngi la ïohi ha ki jingshisha ba ha ka sien kaba ar naduh ba ka sorkar MDA-II ka la shimti ban synshar ban ïohi ïa ka jingthang paidbah ïa u drok ba la kurup ha kaba u Myntri Rangbah u la don lang,” u la ong.
“Nalor kata, ngi la pan ruh bun ki jingkyrshan napoh ki nongïalam shnong bad ngi la ïoh ka jubab kaba bha bad ngi la ïoh ka jingkyrshan kumjuh ruh na ka Mawlai Town Dorbar kaba la ïatreilang ha kti ha kjat bad ngi haba ïadei bad ki jaka sumar ïa kiba kyrni dih drok ne ki de addiction centre. Ki dorbar shnong kum ka dorbar shnong Mawbah bad ka Upper Mawprem ki la wan shakhmat da kaba ai jingmut ban thaw ïa ki VDP. Kine ki dei ki jingmih bad ki jingjop kiba ka sorkar ka la ïoh,” bynrap u Bah Lyngdoh.
Halor ka jingkynnoh ba khang noh ïa ka rehab centre ha Mawlai, u Myntri u la ong, “Ka don tang kawei ka jingeh kaba dei ka jingpynkynriah ïa ki centre namar ki don ki daw namar ka sorkar jylla ka la pyllait ïa ka pisa kaba long T. 25 lak bad ngin trei khambha shuh shuh ban ai ki jingïarap ïa ki bad kane kan urlong ruh shisien ba la ïoh ka jaka kaba biang na ka bynta kane ka jingpynkynriah ïa ka centre.”
Shuh shuh u Myntri ka Sorkar u la ong ba kumba ka long mynta kam pat shym la don kano kano ka jingujor na kino kino ki liang shaphang ka jingpyndonkam bakla ïa ka pisa.
“Phi ïohi kin don bun ki briew kiba lah ban ong bun kiei kiei ha ki social media, ngi kloi ban pdiang ïa kino kino ki jingkynthoh ki ban ïarap ïa ka sorkar khnang ba kan lah ban trei khambha. Ngi don ruh bun ki jingïashim bynta lang jong kiba bun ki riewpaw khmat bad kawei na kane kadei ka jingïalum lang kaba la long ha NEC, Nongrim Hills bad ngi long kiba kloi ban pdiang lada ki don ki jingujor namar ka DREAM kam dei tang na ka bynta ka bha ka miat ha ka imlang sahlang, hynrei ngi don ki pulit, ngi don ka tnat ka koit ka khiah, ka tnat pule puthi, ka tnat aiñ bad kine ki dei ki tnat kiba la khmih bad pynïaid da ki heh ophisar sorkar kiba la shemphang bad kiba la ih bha ha ka kam,” u la ong.