Ka Prof. SM Sungoh kum ka Pro VC ha Shillong, ka Prof. Fameline K. Marak ha Tura

Shillong, Naiwieng, 13: Katkum ka itkiar ba la pynkupbor hapoh ka Section 12 (3) bad (13) jong ka North Eastern Hill University Act, 1973 bad Section (3) jong ka Statutes jong ka University, u Vice Chancellor ka skulbah NEHU u Prof. PS Shukla ha ka sngi Balang u la thung ïa ka Prof. SM Sungoh na ka Department of Education ka skulbah NEHU kum ka Pro Vice Chancellor jong ka skulbah NEHU Shillong Campus bad ïa ka Prof. Fameline K. Marak na ka Department of Garo ha ka Tura Campus naduh ka 13 tarik, Naiwieng, 2024 katkum ka jingmynjur jong ka Executive Council.
Ha ka jingpynbna ba la soi da u Assistant Registrar (Planning) la pyntip ba ka samoi treikam bad kiwei kiwei ki kyndon halor ka jingthungkam ïa kine ki arngut ki Pro Vice Chancellor kan long kum ka Act bad ka Statutes jong ka skulbah ba la pynbeit thymmai na ka por sha ka por.
Ka jingthung ïa kine ki arngut ki Pro Vice Chancellor ka long hadien ba ki samla pule jong ka skulbah NEHU ki la pynlong ïa ka jingïakhih da kaba shah thngan khlem pud sngi namar ka jingmynthi jong u Vice Chancellor.
Nalor kane ka jingdawa, ki samla pule ka skulbah NEHU ki la dawa hiar shuki ïa u Vice Chancellor u Prof. P.S Shukla, ban wengkam ïa u Registar u Omkar Singh bad ïa u Deputy Registrar u Amit Gupta kynthup ruh ïa ki nonghikai bad ki nongtrei ba la shu thungkam be-aiñ nalor kiwei kiwei de ki mat jingdawa ba ki samla pule ki la ïakynduh jingeh.
Haba kynthoh halor ka jingpynbna jong u Vice Chancellor ba la thung ïa kine ki arngut ki nonghikai kum ki Pro Vice Chancellor u President jong ka NEHUSU u samla Sandy Sohtun u la ong, “ngim kwah shuh ïa kata ba kan don ka thup bahakhmat eh, hynrei kaba ngi kwah mynta ka long ba u Vice Chancellor un hiar shuki bad ha kaba ïadei bad ka jingthung ïa ki Pro Vice Chancellor ngin sa ïakren tad ynda u la hiar na ka shuki.
Halor ka jingpynbna ba la pyllait da u Assistant Registrar (Planning) u President ka NEHUSU u la ong, “ka jingpynbna ka dei kaba la pyllait da u Assistant Registrar (Planning) kaba na ka por sha ka por ïa ka jingpynbna la pyllait da ki Registrar ne ki Joint Registrar ne Assistant Registrar (Establishment) hynrei une u Assistant Registrar (Planning) u de u briew la thung hi da u VC bad mynshwa u donha ka Deparment of Bio Informatics bad u dei uwei na ki Asst. Lab Technician bad mynta la thung ïa u ha ka Department of Zoology bad la thung ruh ïa u ha kajuh ka por kum u Assistant Registrar (Planning).
“Katba nang ïaid ki por u VC u la nang leh donbor shuh shuh bad u la sdang ban pyndonkam ïa ki briew jong u,” u la ong.
“Ngi ladep thoh ïa ka shithi sha ki nonghikai bad sha ki nongtrei ba kim dei ban ïadon bynta ha kino kino ki jingïalang bad ki rai ba la pynïaid da u Prof. Shukla. Ngi la rai ban ym biang ïa kano kano ka rai ba la pynmih da u Vice Chancellor bad kumjuh ruh ngi la bthah ïa ki dkhot jong ngi ba kim dei shuh ban dang don ha ka jingïalang ba la pynïaid da u Vice Chancellor,” u la bynrap.
U la ïathuh ruh ba ki Dean kiba dei ki dkhot jong ka Emergent Executive Council la ong ruh ba kaei kaei kaba u Vice Chancellor u la kren ha ki lad pathai khubor ka dei kaba shu thok shukor.
“Ka jingleh jong u mynta ka la pyni ïa ka jingleh donbor bad u ladep thok bad u la kwah ban leh donbor shuh shuh bad ngim don shuh ka jingshaniah ïa ka jingïalam jong u mynta,” u la ong shuh shuh.
U President ka NEHUTA u Prof. Lakhon Kma u la ong, “ngam tip kumno u pynmih ïa kine ki kyrteng bad kumno u pynbna. U ladep kren neem ïa ki ngam tip. Hynrei nga khmihlynti ba kin ym shim ïa ka shuki ba la thung namarba ka long kumba dung ïa ngi da ka tari nadien. Kam don jingmut eiei ïa ngi kum ka jaidbynriew lada ngi shah ha une u Vice Chancellor ba um don hangne bad uba rieh sha kyndong ba un pyndonkam ïa ka bor jong u da kaba thung ïa ki Pro Vice Chancellor.”
“Kane kam dei ka jingdawa jong kine ki samla pule bad ngim dei ki tynshop ha ka kti jong une u Vice Chancellor. Kane ka jingleh jaboh jong u Vice Chancellor u kwah ban wanrah ka jingpynpra hapdeng jong ngi, lehse u wad khnang da ki nonghikai na Khasi Hills bad na Garo Hills,” la ong shuh shuh u Prof. Kma.
“Mynta ba ka um ka la poi ha ryndang u ïaleh ban jngi bad ban pynbiej ïa ngi bad ki arngut ki nonghikai kim dei ban shah pynbiej ha u Vice Chancellor namarba lada shah pyndonkam kum ka atiar ban pynpra ïa ka jaidbynriew ngi sngewsih ïa kane khamtam eh ba i Prof. SM Sunggoh ha Jymmang, 2025 in sa shongthait noh. Kam don jingmut eiei ïa i ban shimti. Nga kyrpad ïa i ban sngewthuh ïa ka jong ki samla pule bad ki nonghikai khamtam ki nonghikai paradoh parasnam lada phi shim ïa kane ka kam ka pyni ba phi dung ïa ngi nadien da ka tari.