Shillong, Jymmang, 22 : Ka Meghalaya ka dei ka jylla ba long lum ha kaba 80% ki briew ki im ha ki thaiñ nongkyndong. Ka kam rep kam riang bad ki kam ba ïa syriem ïa kine, ki long ki lad kamai jakpoh jong kiba bun ki briew ha ka jylla. Hynrei hadien katto katne por, kan sa don ka jingkylla ha ki kam ba ki ju trei kine ki briew. Ki samla na nongkyndong ki la poi noh sha ki nongbah bad sha kiwei pat ki jylla ban wad da kiwei ki lad ban kamai jakpoh, kaba pynmih shibun ki jingeh ha ka imlang sahlang ha ka jylla.
Ka jylla ka don shibun ki lad ki kabu kiba lah ban rah shajrong ban kyntiew ïa ka ïoh ka kot kaba neh. Haba shim khia ïa kane, ka Sorkar Meghalaya ka kwah ban kyntiew ïa ka jingsengkam lajong, ban kyntiew ïa ka rukom im ki nongshong shnong jong ka bad ban pynneh ïa ki samla na ka jingphet shabar shnong. Kumba la ïohi lyngba ki program kum ka PRIME, ka Sorkar Jylla ka la seng ïa bun ki prokram bad ki jingtrei ha kine ki snem ba la dep.
Ka PRIME Sauramandala Rural Entrepreneurship Fellowship (PSREF) kan plie lad ïa ki samla bad kan ai mynsiem ïa ki nongpynkylla na kylleng ka Ri India ban wan treilang kum ki Fellows & ki Associates. Kin wan ïa snohkti lang bad ki nongsengkam lajong ha ki thain nongkyndong ka Meghalaya, ban tei bad pynïar ïa ki kam jong ki bad kumjuh ruh ban pynieng ïa ki rynsan na ka bynta kiwei ruh ba kin ïoh ïa ka jingmyntoi. Kin wad ïa ki nongsengkam lajong ha ki thain nongkyndong kiba tbit ha ki block bad ki shnong bad kin ai jinghikai ïa ki ha ka roi ka par, ki kor ki bor bad ban pyntreikam ïa ki buit teknoliji.
Kine ki Fellows bad ki Associates kin sa ïoh ïa ka lad ban wanrah ïa ka jingkylla, ban wanrah ïa ki policy treikam bad ban don bynta lang ban ïasam ïaki buit bad ki nongthaw ain kiba ha jylla. Ha ka por ba ïaseng, ki nongïashim bynta kin sa ïoh ki jingtip ba kham bniah bad ka lad ban pynithuh ïalade sha ki bor Sorkar, ban ïarap ïa para Fellows bad ki Associates bad ban kyntiew ïa ka jingsengkam lajong.
Kine ki PRIME Sauramandla Fellows kin wan na kylleng ka Ri India ban wanrah ïa ki jingnang bad jingtip na shabar jylla, katba ki PRIME Sauramandala Associates kin kynthup tang ïa ki nongshongshnong na Meghalaya. Ha kine ki 18 bnai jong ka Fellowship, kine kiba shah jied kin shah phah sha ki block bapher bapher ha kaba kin sa trei bad ki shnong ki thaw ban pynïar ïa ka PRIME ha Meghalaya.
Ka PSREF ka dei ka jingïatreilang jong ka PRIME Meghalaya (kaba dei ka prokram jong ka Sorkar Meghalaya) bad ka Sauramandala Foundation, ba la kyrshan da ka Sorkar Meghalaya lyngba ka tnad Planning bad ka pisa CSR na ka Rainmatter Foundation.
Ki riew shimet ki ba kwah ban apply sha kane ka Fellowship ki lah ban leit sha ka website www.primemeghalaya.com/fellowship khnang ban ïoh ïa ki jingtip ba kham bniah halor ka Fellowship bad ka rukom thep kyrteng.
