Ka por ka ladei ïa ki paidbah ban ai jingsneng ïa ki High Level: Dr Mukul Sangma

Nongstoiñ, Nohprah, 10: Ha ka jingïalang paidbah ba la pynlong da ka seng saiñ pyrthei kaba dang thymmai ha ka thaiñ bad ha ka jylla hi baroh kawei ka All India Trinamool Congress ha madan shnong Tiehsaw Nongstoiñ West Khasi Hills District ha ka sngi palei, u myntri rangbah barim ka jylla Meghalaya u Dr.Mukul Sangma u la kynthah tyngeh ïa ka sorkar MDA hapoh ka jingïalam jong ka seng NPP, da kaba u la ong, “Nga la kyndit haba nga ïoh sngew ïa ka kyntien High Level haba nga tur sha Rilum Jaiñtia, sha Ribhoi bad haba mynta nga wan sha thaiñ West Khasi hills ruh nga ïoh sngew ïa kajuh ka kyntien. Hynrei nga ong pat ka bor kam shong ha ki High Level, hynrei ha phi u paidbah u ba la jied ïa ki, kumta ka la dei ka por ban pynduh noh ïa kita kiei kiei baroh”.
U Dr Mukul u la ther ruh ïa ka seng BJP bad ki seng trai ri da kaba ong ba kim don jingïapher ei ei bad ka BJP. Ha kaba ïa dei bad ki seng trai ri bad ka jingthmu khang bam doh masi jong ka BJP, u Dr.Mukul Sangma, u la kynthah tyngeh ïa ka BJP da kaba u la ong ba katei ka seng saiñ pyrthei, ka la khang wat tang ban bam ïa ka doh masi, kaba dei kawei na ki doh kaba ngi ju bam man ka sngi bad kaba ngi bang ban bam. Hynrei ki seng trai Ri kiba ju kam bad pyrta ba ki ieid ri, kum ka seng HSPDP, UPD, KHNAM, PDF bad kiwei kiwei, ki shu sngap jar jar bad ki kyrshan pynban ïa kum kata.
U la ong ba ka jingdonlang jong ki ha ka sorkar ka pynpaw ba ki kyrshan ban khang bamdoh masi, hawto kim kynmaw ïa kaei kaba ki la kular ïa u paidbah da ki kyntien ieid ri. U la ong ruh ba ka MP jong ka seng NPP kaba dei ka para trai jong u Conrad K.Sangma, kumno ka nud ban leit kyrshan ïa ka CAA, katba u hynmen jong ka pat shuwa kata u ong ka seng jong u da lei lei kam mon ïa katei ka aiñ khyllah.
U bah George B.Lyngdoh MLA ka Umroi konstitwensi haba ai jingkren ha ka jingïalang paidbah, u la kynthah tyngeh ïa ka BJP da kaba u la ong ba katei ka seng saiñ pyrthei ka la pynkiew dor lut ïa ki marbam mar dih, ka wanrah jubor ïa kiei kiei kiba kum ka jaidbynriew rit paid kam mon hynrei la shu pynrung jubor.
“Saw snem shiteng ka la shu leh politik mynta ka kynti haba lah jan ka elekshon, ka wan ban pynbiej da ki scheme bad ka sam da ki sniang, ha kaba ki nongrep kiba ïoh ïa kito ki sniang ki la duh ei noh wat ïa kiba ki lah don lypa, namar ka jingïap bad ka jingpang jong ki sniang kaba la ai da ka sorkar”, u la ong.
Ha katei ka sngi kaba dei ruh ka jingïalang paidbah la ïadonlang ruh u samla Macmillan Kharbani kyrtong MLA ka TMC na ka Nongstoiñ konstitwensi ha kajuh ka por kum President ka Nongstoiñ Block Trinamool Congress, u Fernandez Dkhar uba dei ruh u President Meghalaya Pradesh Trinamool Youth Congress uba dei ruh u kyrtong MLA ka TMC na ka Rambrai Jyrngam konstitwensi, bah Charles Pyngrope President ka Meghalaya Pradesh Trinamool Congress, kiwei kiwei ki riew rangbah jong ka thaiñ bad la pynïaid ïa katei ka jingïalang da u bah Manik Sing Kharbani.