Ka por ka la dei ba ki shnong ki thaw kin maham tyngeh ïa kiba wiang ding pathar ïa ki lum

Nongstoiñ K’lyngkot 08: Ka aïom ryngkhiang ka la sdang ki lum bad ki khlaw ki la tyrkhong ki riew shim kabu ki la sdang ban wiang ding kat haba lap ba shem kaba lah ban wanrah ïa ka jingma khamtam ïa ki ïng ki sem kiba don harud jong ki khlaw bad ki lum kiba don ïa ki phlang sañium kiba jrong.
Haba ïaid kylleng ki bynta jong ka West Khasi hills la ïohi ba ki lym phlang ki la ïong ngaiñ bad ka jing itynnad jong ki ka la jah noh.La lap ruh ba ka tdem ding ka mih na man la ki ‘law bniap bad wat na ki khlaw kiba jyrngam namar ka jingthang rnga pathar khlem da burom lem ïa ka jingitynnad jong ki sawdong saw kun kiba la pynkup ha ka mei mariang da u Nongbuh nongthaw.
Ban lait na ka jingpynjulor bad ka jingwiang ding pathar jong ki riew shim kabu ka por ka la dei ba ki shnong ki thaw kin peitngor bad kin pynlong ruh ïa ki jingpynshai paitbah ban pynsgewthuh ba ki dei ban kylla noh na ka jingmlien kaba rim bad ban pyrkhat thymmai ha ka jingim jong ki namar ka jingwiang ding bad ka jingthang rnga pathar ka dei ka jingtim kaba khraw ïa ka pateng ban wan.
Ka long kaba lynoh ba kiba bun ki briew haba pyrshang ban pynsngewthuh ban ban pynshai ba ki dei ban kiar na ka jingwiang dingpathar ka jubab kaba ki ai ka long ba ka dei ka jingkyrduh bad ka jingbym ïoh bylla katba lada wad nong bylla pat shitom ban ïoh.
Haba phai ha kane ka mat ba ki jubab ym lah ban len ba kat kum ka jingïaid ka por ki briew ki la kwah ban shu im suk khlem da trei shitom.Nalor kata ka por ka la dei ba ki bor sorkar kiba bat ïa ka aiñ ki la dei ban shimkhia khamtam eh ha kaba ïadei bad ka jngthang rnga pathar kaba la ktah haduh katta katta ïa ka mariang bad ki um ki wah.
Ym tang katta hynrei ka ktah ruh wat ïa ki jingthaw ba im ki mrad ki mreng bad ki sim ki doh namar haba la synlen ki khlaw ki mrad ki mreng kim don jaka shong shuh, ki sim ki don kim ïoh jingbam shuh, ki dawai kynbat ba laiphew jait ki duh noh bad lada ki paitbah non shong shnong bad ki bor ka aiñ kim shimkhia ban pynsangeh ïa katei ka kam beaiñ ka jingtim kan long ïa ki khun ki kti ha ka pateng ban wan.