Ka PMJUGA kan long ka jingmyntoi ïa ki riewlum, ong ka Nirmala
![](https://mawphor.com/wp-content/uploads/2024/07/lead-2.jpg)
Shillong, Naitung 23: Ka Myntri Sorkar Pdeng ba dei khmih ïa ka Tnat Kam Pla Tyngka, ka Nirmala Sitharaman ka la pynbna ba ka sorkar kan plie paidbah ïa ka Pradhan Mantri Janjatiya Unnat Gram Abhiyan, haba wanrah ïa ka Mang Tyngka 2024-25 jong ka sorkar pdeng ha Parliament hynne ka sngi.
Ka Myntri Kam Pla Tyngka ka la ong ba ka Abhiyan kan kyntiew ïa ka jinglong ha ka imlang sahlang bad ka ïoh ka kot jong ki jaitbynriew riewlum. Da kaba batai ba la thmu ban pynpoi lut ki kam na ka bynta ka jingkyntiew ïa ki jingdon jingem bad ban wanrah ïa ka hok ha ka imlang sahlang.
Ka Myntri pla pisa ka la bynrap shuh shuh ba ka skhim kan kynthup lut ïa baroh ki longïing jong ki riewlum kiba sah ha ki shnong ba bun paid ki riewlum bad ki aspirational district.
Ka Pradhan Mantri Janjatiya Unnat Gram Abhiyan ka thmu ban kynthup 63,000 tylli ki shnong bad ka thmu ban ai jingmyntoi ïa 5 klur ngut ki riewlum ha kylleng ka ri.