Ka pisa kam dei ban long kynrad ïa u briew haba shna hi ma u: Dr. Ricky Syngkon
![](https://mawphor.com/wp-content/uploads/2023/06/Dr-Ricky.jpg)
Khliehriat, Naitung, 22: U General Secretary ka Voice of the People’s Party (VPP), Dr. Ricky AJ Syngkon ha ka sngi Saitjain u la ong ba ka pisa ka dei tang ka shakri bad kam lah satia ban long ka kynrad ïa u briew naba dei ma u uba shna ïa ka.
Ïa kane u lakren ha ka jingïalang paidbah ba la pynlong da ka VPP ha Khliehriat ha ryngkat ka jingdonlang u President Rangbah ka Party, Bah Ardent Miller Basaïawmoit nalor kiwei kiwei ki nongïalam ba rangbah ka party.
“Kumno ïa ka pisa ba shna hi da u briew, ka kot kan long kynrad ïa u briew, ngi hap ban sngewthuh ba ngi bat ma ngi ïa ka jinglong kynrad. Balei ka VPP ka mih, ha u snem 2020-2021 ngi la ïa shong ïa pyrkhat bad haba peit ïa ka jinglong jingman ka jylla ngi ïohi ïa ki kaiphod kiba pyni ïa ka dur, ka dar jong ka jinglong ka jylla jong ngi, kat shaba ngi phai ngi la hiar, ngi la hiar ha ka khuid ka suba, hiar ha ka khaïi ka pateng, hiar ha ka jingnang jingstad, kumjuh ruh haba phai sha ka koit ka khiah, ka rep ka riang bad kiba bun ki liang ka la hiar sha trai.,” u la bynrap shuh shuh.
Nalorkata, u la buh jingkylli ruh ba um tip shuh kaei kaba la jia ïa ka jylla ha kine ki sanphew snem. “Ah lada ki briew jong ngi kin sngewthuh ïa kata ka dor jong ka synshar khadar kaba beit kaba khuid ka jylla jong ngi ka la kylla dur da kumwei pat. Kum ka party, ngi sngewthuh ba ka synshar ka khadar ka dei ka kam kaba kyntang, ka dei kaba la buh beit buh ryntih da u Blei naduh ki por ka hima Israel, ki syiem kiba kohnguh ïa u Blei, kum ha ka por jong u Moses uba ïalam ïa ki khun Isreal, te haba don ki nongsynshar kiba shakri ïa u Blei ka ri Isreal ka dei ka ri kaba dap ki jingkyrkhu.”
Shuh shuh u la ïathuh ruh ba ha ka por ba ki sdang ïa ka party, ki la pyrkhat ba kam long satia kaba suk ban pynkylla ïa ka synshar khadar. “Hynrei ngi kum ka party ngi sngewthuh ba haba ngi phai khmat sha u Blei ym don kaba eh, dei u Blei u ban ïaleh na ka bynta jong ngi, naduh ba sdang ka party ngi ïohi ïa ka ksang kti jong u Blei kaba la ïalam ïa ngi, kumta ngi la mih shakmat ban kren shaphang ka synshar khadar kaba khuid ba kyntang. Ngam artatien ba u Blei un ïarap ban wanrah ïa ka synshar khadar kaba khuid bad ïa kane ka kam synshar ka shong ha phi ki paidbah.”
Nalorkata, u ong ruh ba ki sngewnguh ïa u Blei uba la sei ai ka VPP, ka party kaba ieng na ka bynta ka ri bad ka jaidbynriew na ka bynta ka jylla da ka thong ban kyntiew pat ïa ka nam ka burom jong ka ri kaba baroh ki ju sngew sarong ha ki por ba la leit noh. U ong ruh ba ki don ka jingkyrmen na ka bynta ka pateng ka ban wan namar ki kwah ban ïalam ïa ka ri ka jaitbynriew sha ka lawei ba phyrnai da ka lynti ka hok bad kaba shisha, kaba don ka jingkyrmen bad don ka jingshngaiñ.