Shillong, Nailur 23 : U Myntri Rangbah ka jylla Conrad K Sangma ha ka sngi Thohdieng u la pynshai ba ki paidbah kim dei satia ban sngewthuh bakla ba ka pisa kaba ai sha ki Producers Group kadei ka ram.
Haba pynbna ïa kane ha ka jingïalang sam ïa ki khun sniang bad ruh ïa ki song jingïarap sha ki nongrep ha Raksamgre, u Myntri Rangbah u la ong ba katei ka pisa ba ki ai sha kitei ki PG kadei beit ka ka jingkyrshan pisa na ka bynta ban kyntiew ïa ka rep ka riang nalor kiwei kiwei.
Lyngba ka Rural Backyard Piggery Scheme u Myntri Rangbah ha katei ka sngi u la sam ruh haduh 2000 tylli ki khun sniang sha ki 500 ngut ki nongri jingri nalor ka jingsam ïa ki cheque sha ki producer group bad ruh ïa ki FOCUSS + card. Lyngba ka YESS Meghalaya Programme, u Myntri Rangbah u la sam ruh ïa ka jingïarap sha bun ki seng samla.
Shwa kane la sam ruh ïa ki cheque ba 33.90 lak tyngka sha ki Producer Group kynthup ruh ïa ki riew shimet lyngba ka skim FOCUSS+. Lada kheinlang na kitei ki skim baroh ar tylli ki nongioh jingmyntoi kin ioh haduh 10,000hajar tyngka. Ka la don ruh ka jingsam ïa ka Community Investment Fund sha ki SHG jong ki longkmie bad ki la don ruh san tlli ki Village Organisation kiba la ioh 5.80 lak tyngka katba ki don pat haduh 21 tylli ki kynhun jong ki samla kiba la ioh ïa ka jingkyrshan pisa kaba long 9 lak baroh lyngba ka YESS Programme.
U Myntri Rangbah u la buh ruh ïa u mawnongrim ban tei ïa ka jaka treikam ba thymmai jong ka Raksamgre Civil Sub-Division, kaban pynieng ha ka mang pisa kaba 4 klur tyngka. Ha kane kajuh ka sngi, u la plie paidbah ruh ïa ki ar tylli iing skul ha katei ka civil sub-division kata ka Pedaldoba Govt Aided Secondary School bad ka Raksamgre Higher Secondary School.
