Ka Pinewood Hotel ka la bat ïa ka nam kum ka Hotel ba pawnam ha ri India ha ki snem 1990: Paul Lyngdoh

Shillong, Nohprah 21 : Ka Pinewood Hotel kaba dei ka hotel ba la rim bha ha ka Jylla ka la paw ruh kum kawei na ki 50 tylli ki hotel ba pawnam ha ka Ri India baroh kawei ha ki snem 1990, ong u Myntri ka tnad Kamjngohkai Pyrthei, Bah Paul Lyngdoh.
Ïa kane u Myntri u la kren ha ka jingïalang rakhe ïa ka lyngkhuh dap 126 snem ka jingïaid lynti bad ka jingshakri jong kane ka hotel kaba long ha kane ka sngi Thohdieng.
U Myntri u la pynpaw ruh ïa ka jingsngew hun haba ïadei bad ka jingpynbha lut ïa kane ka hotel kaba kynthup ïa ka kamra billiard kaba la bna nam. U pyntip ruh ba ka sorkar ka thrang ban pynbha bad pynwandur shuh shuh ïa ka Pinewood Hotel sha ka dur ba rim hapoh une u snem 2025. “Kane ka dei kawei na ki hotel ba la rim tam ha ka ri bad la buh kyrdan ruh kum kawei na ki 50 tylli ki hotel ba pawnam jong ka ri India naduh ki snem 1990,” ong u Bah Paul.
Shuh shuh u la ïathuh ruh ba kane ka hotel ka la don ruh la ki jong ki khana pateng da kaba ïoh ban pdiang ïa ki briew kiba pawnam ha ka pyrthei kum u Dalai Lama bad u Victor Banerjee. U ïathuh ruh ba ïa kane ka Hotel la seng nyngkong da ki shijur na Switzerland bad hadien kane pat ki trei lang bad ka longiing Assamese Chaudhary ha ki snem 1960 .
“Haba phi leit sha Pinewood, phim ju pyrkhat ba ka dei ka Hotel 5 Star lane 7 Star. Ha ka jaka kata, haba phi mih shabar bad peit sha jrong, phi ïohi da ki spah tylli ki khlur,” u la bynrap biang. U ong ruh ba da kane ka sienjam ba ka sorkar ka shim kan pynkhlain shuh shuh ïa ka thong ban kyntiew shuh shuh ïa ka kam jngohkai pyrthei ha ka jylla.
Kawei na ki thong ka long ban sei pyrthei bad lum thup biang ïa ki jingdon jingem kiba rim, ki dur ba la rim, ki tiar ba ju pyndonkam haba bam ba dih kaban khring bad pynlong ïa ki nongwan kai ba kin ïohi ïa kiei kiei jong ka mynnor. U la ong ruh ba ka kamra billiard kaba don syndah bad ka jaka buh ïa ki tiar ki tar ba rim (Museum) ka la dep ban pynbha lut bad kane ruh kan dei kawei na ki jaka kaban khring bha ïa ki nongwan kai. U ong ruh ba ka jingthmu ka long ruh anka bynta ban pynheh ïa ka museum khnang ba yn lah ban pynrung bad kynthup kham bun shuh shuh ki jingdon jingem kiba bun.