Shillong, Jylliew, 08: Ka Petroleum Dealer Association, Meghalaya (PDAM) ha ka sngi Balang ka la mih shakhmat ban pynshai halor ka jingkhleh um ha ka umphniang Petrol. Kane ka jingpynshai jong ka PDAM ka long hadien ba la mih ka jingshah kynnoh jong kawei Petrol Pump kaba don ha ka Shnong Nongspung, West Khasi Hills Distrcit ba ka la khleh ïa ka umphniang petrol ba ka um.
Ha ka jingïakren bad ki lad pathai khubor, u dkhot jong ka Petroleum Dealer Association, Meghalaya (PDAM) u Bah Kennedy C. Khryiem u pynshai, “ki Underground Tank kiba don hapoh khyndew ki dei kiba la don da ki snem. Don kiba la khatsan snem, la arphew snem bad kumta ter ter. Na ka por sha ka por, ngi ju pynkhuid bad ngi ju pyndait thymmai ïa ka Manhole, kaba don ïa i thliew barit bha. Ha kane ka Manhole kaba don ïa ka Suction Pump kaba tan ïa ka Umphniang Petrol ban leit sha ki mashin ban theh umphniang. Ha ka Manhole ka don ka Casket ka dei ka jri kaba ynda la slem ka ran bad nangto ka lah ban jreiñ khyndiat pa khyndiat ka um shapoh ka Tanky. Dei na kata ka daw ka Tanky ka lah ban don ïa ka um. Ka Petrol ka dei ka kynja kaba dait thah bha bad ha ka por lyiur ba jur ka jingshit ka lang jynhaw bad ka rung shapoh ka Tanky.”
“Ngi ki Dealer jong ki Petrol Pump kaei kaba ngi leh ka long ba ngi tan ïa ka um na ka por sha ka por ban pynthikna ba ki Underground Tank jong ngi kin khuid. Lada kata ka Petrol kaba wan ryngkat bad ka Ethanol kaba la khleh lang bad ka um bad lada long kumno kumno ruh kan don hi ka um hangne hangtai,” u la ong.
“Kaba donkam ka long ban ba ngin hap ai jingpynshai sha ki paidbah nongniah kali ba ka Petrol kaba ka Sorkar ka phah mynta ka dei kaba khleh bad ka um,” la ong u Bah Kennedy.
“Lada phi leit ha kawei pa kawei ka Petrol Pump, hapoh ki mashin kiba ngi theh ïa ka Umphniang ka don kawei ka Sticker kaba thoh 10% Ethanol Blended kaba mut ba ka Petrol kaba la khleh lang 10% bad ka Ethanol. Kata ka dei ka jingpynshai kaba ngi ki Dealer ngi kwah ban pynshai sha ki paidbah halor ka Ethanol,” ong shuh shuh u Bah Kennedy.
Haba kynthoh halor ka jingshah kynnoh jong ka Petrol Pum ha Nongspung, West Khasi Hills u Bah Kennedy u la ong, “ha kine ki sngi ki la don kiba la shah ktah bad kawei ka Petrol Pump ha Nongspung, West Khasi Hills kaba la shah ktah na ka jingkynnoh ba ki khleh um. Mano bym khleh um ïa ka petrol? Ha Laitkor, ka Bharat petrolum RO ka la shah kynnoh ba ka khleh um ha ka petrol.”
“Kine kiei kiei ki jia na ka por sha ka por khamtam mynta ha ka por lyiur bad khamtam ka jingdon 10% ka Ethanol na ka liang jong ka Seng ka pynshai sha ki paidbah ba ki dei ban tip ïa kane bad kane kam dei kaba ngi leh ma ngi bad ka dei kaba wan na ka Kompeni bad kaba don 10% ïa ka Ethanol,” la ong shuh shuh u Bah Kennedy.
