Nongpoh, Nailar 31: Ka long ka khubor kaba kmen bad kaba ai jinghun na ka bynta ki paidbah ka thaiñ Ri Bhoi Sepngi ha Ri Bhoi District, ha kaba mynta ka sngi u myntri Rangbah ka jylla, u Conrad K. Sangma u la kren shai ba ka Patharkhmah ka la don hok ban ioh noh ïa ka kyrdan Civil Sub Division na ka kyrdan Administrative Unit khnang ban pynsuk bad ban pynïajan ïa ki kam shakri sorkar na ka bynta ki paidbah katei ka thaiñ Ri Bhoi Sepngi.
Na ka liang u Myntri rangbah ka jylla, u Conrad K. Sangma u la kren shai halor ka jingdawa Civil Sub Division ki paidbah ka thaiñ Ri Bhoi Sepngi, haka jingïakren bad ki nongthoh khubor mynta ka sngi ha Byrnihat ba kum ka sorkar ka dang bishar bñiah bin pa bin kaba dang don ruh hapdeng ka jingeh ha kaba ïadei bad ka mang tyngka, hynrei u la pynthikna ba katei ka Civil Sub Division ha Patharkhmah kan sa urlong.
U Myntri Rangbah u la kren shai ruh ba ki don kumba 9 tylli ki jingdawa Civil Sub-Division haka jylla bad napdeng kitei ki 9 tylli ka Patharkhmah ka dei kaba hakhmat eh bad kaba donhok shisha ban ioh noh kaba long ka khubor ba pynkmen ïaki paidbah.
“Ka Patharkhmah ka la dei kawei na ka thaiñ kaba la jngai bha ban wan shaduh sha Nongpoh ha kiba ïa dei bad ki kam sorkar bapher bapher kiba dei na ka bynta ki kam paidbah bad lada wan rah noh da ka Civil sub Division ka la long ka jingmyntoi kaba khraw ïa ki paidbah ha kiba ïa dei bad ki kam shakri paidbah lyngba ki tnad sorkar bapher bapher” ong u Myntri rangbah ka jylla, u Conrad K. Sangma.
Shuh shuh, na ka liang u Myntri Rangbah ka jylla, u Conrad K. Sangma u la kren shai ba ka sorkar haduh mynta ka dang pyrkhat sani halor kane ka jingai ïa ki Civil Sub-Division bad kam slem shuh ba ka sorkar kan shim ïa ka rai ban pynurlong ïa kitei ki mad jingdawa ban kyntiew kyrdan na ka Administrative Unit sha ka Civil Sub Division, u la bynrap.
