Shillong, Nailar 22 : Da kaba buh hakhmat eh ba ki khun ki ksiew kin ïoh lem ban ring mynsiem da ka lyer kaba khuid, ka Dorbar Shnong Patharlyndan ka nongrit kaba don sharum Mairang da ka jingïatrei lang bad ka Ïatreilang Edmund Rice Youth Action ha ka sngi Nyngkong ka la pynlong da ka jingthung dieng ha u lum ba ki la jied kyrpang ban pynkylla long kum ka ‘lawbah.
Ha kane ka sngi la pynshongkun da ka jingdonlang u Lamphang ka Iing Dorbar Thawain ka jylla, Bah Metbah Lyngdoh ba dei ruh u MLA ka thain, nangta u Deputy Commissioner ka Eastern West Khasi Hills, Bah Wilfred Nongsiej, Additional Superintendent of Police ka District, Bah Herbert Kharkongor, Bah Esakeal Lyngdoh police, Dongki-ingding nangta Br. Sunil Britto na Jyntru, Nongpoh, Fr. Michael Sun ba dei Parish Priest na Umkador, ki Vistitation Sister na Umkador, Bah Morwing Mawlong, Tymmen Basan Patharlydan bad bun kiwei kiwei.
Kane baroh ka urlong namar ki nongïalam shnong hapoh ka jingïalam jong u Bah Andreas Mawlong ki la ai kyrpang kawei ka jaka na ka bynta ban thung dieng da ka jingkyrmen ba ha kawei ka sngi kane ka jaka kan sa long ka khlawbah. Katei ka jingïohi jngai jong ki, ka long ba khnang ba ka pateng ban sa wan kan ym donkam ban mad shuh ïa ka jingkyrduh umbam umdih.
Dei na kane ka daw ba u Sordar bad ki nongshong shnong, ki samla bad ki Christian Brothers ki la snohkti lang kawei ka bor kawei ka buit ban pyni noh da ka kam kumno ban pynneh ïa ka mariang.
Haba kren kum u Kongsan, u Bah Metbah u la pynpaw ïa ka jingkmen ban ïohi ïa ki kum kitei ki prokram ba ki paidbah dalade ki sngewthuh haduh katno ka kordor ban pynneh pynsah ïa ka mariang khamtam ïa ki khun ki kti kiban ha ka pateng ba hadien. U la ai mynsiem ruh ba kum kane ka sienjam dei ban bteng biang wat ha ki snem ban wan bad ruh ban thung kham bun ki dieng.
Na ka liang u Deputy Commissioner pat u la batai shaphang bun ki skim kiba lah ban ïoh na ka sorkar na ka bynta ban pynrben ïa ki khlaw ki btap da kaba thung dieng.
La ïoh ruh ïa ki kyntien kyntu kynpham na u Br. Sunil Britto uba la ong ba, ”Sngewbha wat ym pom ïa ki dieng bad wat shah ïa ki masi lane ki jingri ba kin rung sha katei ka jaka.”
La ïoh ruh ïa ka jingkren na u Fr. Michael uba la batai ïa ka jingmut jong ka kyntien Laudato Si… To ai baroh ki jingthaw kin ïaroh ïa la u nongthaw. Na ka liang u Bah Herbert u la ai ka jingïaroh ïa ki paidbah bad kyntu ruh ba kin bteng ban thung shuh shuh kham bun ki dieng ha katei ka jaka.
Ha kane ka sngi la ïoh ruh ïa ka jingkren na u Bah Onbor ba dei u President Seng Samla uba la batai bniah kumno ki seng ïa ka kynhun halor ka phangpdeng, “Da ka Jingïatreilang, ngi lah ban leh kham bun.
La pynphuh ïa katei ka prokram da ka jingwan shim bynta da baroh ki skul kiba don ha katei ka shnong kiba la ai ruh ïa ki prokram bapher bapher halor ka mariang. U Bah Alpheus Wahlang pat u la ai ka jingïaroh ïa katei ka sienjam ba la shim da u Sordar bad ka Executive Committee bad ong ba katei ka jingkyrshan jong ki, ka shong hok ba kin ïoh ïa ka burom.
Katei ka jaka ba la ai kyrpang ban thung dieng la tip kum u ‘Lum Laudato si’. Kane ka kyntien Laudato si kadei ka kyntien phira ba ai da u Kpa Bakhuid Pope Francsi uba la kren kumno ban ïada ïa la ka jong ka rympei.
Lah ruh ban kdew hangne, ba ki Christian Brothers ki la don ha katei ka shnong naduh u snem 2018 da ka thong ban ai ïa kaba bha tam na ka bynta ki nongshong shnong katei ka thaiñ da kaba sdang na ka pule puthi kumba ki la leh ha kiba bun ki shnong kum ha Mawjrong, East Khasi Hills, nangta ha Jyntru hajan Nongpoh. Umtyrkhang ba ha Umsohlait Parish. Wahrinong ha Kynshi.
Ka jingseisoh jong katei ka jingpyrshah kadei ruh da ka jingtrei borbah jong u Bah Tobias Jana, Field Worker jong ki Brodar ba trei ha shnong Patharlyndan ba trei shitom ban wanrah ïa ki kam pynroi bad ruh u Bah Samuel Nonglait uba trei kum u Project Coordinator uba ju wan jyngoh ïa ka shnong ban trei ryngkat bad ki Brodar bad u Field Worker.
