Ka party ba duk ka sei ki kyrtong ba duk ban shakri ïa kiba duk : Powell Sohkhlet

Nongstoiñ, Rymphang 03: Hadien ki 30 tylli ki snem ba u la shakri ïa ka kam paidbah lyngba ki lad pathai khubor, u Bah Powell Sohkhlet ha ka sngi nyngkong kaba dei ka 3 tarik Rymphang 2025, u la pyndep ïa ka jingthep kyrteng jong u na ka bynta ka elekshon MDC na ka party Voice of the People Party (VPP).
Ka jingleit thep kyrteng ka la long ha ka por 12:30 shiteng sngi ha DC Ophis Mairang, ha kaba la synran lang ïa I da I kurim, ki khun, kiba haïing hasem, ryngkat ki spah ngut ki nongtrei ba hajan eh jong ka party.
Shuwa ban leit sha Mairang la pynlong ïa ka jingïalang ba kyrpang ha phyllaw ïing jong u Bah Powell, kaba dei ha Kynshi Mawria ha ryngkat ka jingshongkun bad ka jingai mynsiem da kiba bun ba lang kiba la wan lang ban synran ïa u sha DC ophis Mairang.
Hadien ba la thep kyrteng, u Bah Powell haba ai jingkren sha ki lad pathai khubor u la ong, “Ha ki 30 tylli ki snem kum u nongthoh khubor, nga la dep ïohi lut ïa ka jingeh jong ki paidbah khamtam ka jingbym trei hok jan baroh hi ki MLA, MDC bad jan baroh hi ki nongmihkhmat. Kane ka jingleh jong ki, ka pynlong ïa ka jylla jong ngi ban sahdien bad shibun ki jingeh. Kine ki jinglap jong nga ki pynlong ïa nga ba ngan yn ym hun ban shu sngap kum u nongthoh khubor”.
“Ha ki 30 snem nga la peit shin ïa ka jingtreikam ki political party naduh ka por ka UDP, HSPDP ka Congress, ka NPP bad kiwei de ki party kiba la jah noh. La dep ïohi ïa ki nongïalam naduh ki por bah B.B Lyngdoh, Maieit Hoping Stone Lyngdoh, Dr D.D Lapang, Salseng Marak bad kiwei kum u Conrad Sangma. Nalor nangta nga la ïohi ïa ka jingtreikam ki CEM ha District Council naduh ki phew snem ba la leit noh haduh mynta, ha kaba nga lap ba kam don ka jinghun namar kam don ka jingtreikam kaba bïang”.
“Dei na kane ka daw nga kwah ban rung sha ka politik namar dei tang ha ka kam saiñ hima sima hi kaba lehse nga lah ban leh ei ei. Hynrei ha kine ki 15 snem mynta khamtam eh la ïohi ba ka jingjied ïa u nongthaw aiñ ka dei beit lyngba ka pisa. Ngi kiba duh ba kyrduh ngim ïohlad bad dei ha ka por ba ka seng Voice of the Peoples Party ka mih ha u snem 2021, ba ka la plie lad bad ki nongrim jong ka ruh ki ïahap bad pynshlur bad ai mynsiem ïa nga ban pynïasoh bad ban aireng ha kane ka elekshon”.
“Nga rung sha kane ka seng namar ka dei ka seng kaba nga ïohi bad sngew skhem namar ka dei kaba don ki nongrim, ka kynhun kaba beit kaba khuid bad khamtam eh ba ka don ïa ka thong ban wanrah ïa ka synshar kaba khuid bad pyrshah ïa ka bam sap. Nga ngeit ym tang ka VPP hynrei baroh hi ki paidbah ka Bri u Hynñiewtrep sor ne nongkyndong, ki tip ki sngewthuh ïa ka jingbam sap kaba la shyrkhei ha ka jylla.”
“Ka VPP ka don ïa ka thong kaba don nongrim bad nga ruh nga thrang ban wanrah ïa ka jingsynshar khaddar kaba khuid, kaba ar ka long ban ïaleh pyrshah ïa ka bam sap bad kaba lai kaba kongsan ka dei ba baroh ki dei ban kynmaw ba ka VPP, ka plie lad ïa baroh ki briew kiba duk ban ïaleh elekshon namar ki kham sngewthuh ïa ki jingeh ba ki ïakynduh ha ka jingim”.
Haba kylli halor ka jingjop don burom ha ka MP elekshon u la ong, “Ngin rah biang sa shisien ïa ka burom ha Mawthadraishan Constituency kumba ngi la dep ha ka MP elekshon. Ha ka MP elekshon ka Mawthadraishan ka wan ba ar ha ka jingïoh Vote na ki 36 ki Constituency, ka ïoh haduh 25 hajar tam ka vote”.
“Ngi dei ban kynmaw ba ka Mawthadraishan ka shah kren beiñ ha ki por ba mynshwa, namar ki kynnoh ba tang shu leit ha kane ka Constituency da sam pisa jop beit. Hynrei ha ka elekshon MP ngi la dep ïohi ba ki nongshong shnong ki la stad bad sngewthuh ba kane ka elekshon pisa kam poi shano shano ruh. Dei na kata ka daw ki kyrshan noh ïa u MP ba la jop mynta”.
“Ngin rah biang ïa kane ka nam ka burom ha Mawthadraishan namar ki longkmie ki riew tymmen bad khamtam ki samla ki ong ba ngin rah biang sa shisien ïa kane ka nam ka burom. Bun ki ong u prah u pher na ka MP bad MDC, hynrei ka jingpher ka long tang ha kita kiba ïaleh pyrshah ïa ngi, hynrei ha ki paidbah ka long kumjuh”.
“Ka Voice of the People Party kam don ei ei hynrei ban shakri da ka mynsiem kaba sngewkhia ïa ka ri bad ka jaidbynriew, ïa ki briew ba duk ba rangli ki khunswet, ki riew kynthei. Na kata ka daw ka sei ruh ïa ki briew kiba duk ban shakri kyrpang khamtam ïa kita kiba don ha kyrdan bad ban tiew ïa ki”.
“Ngi don ka jingkyrmen kaba skhem ba kumba ngi la mad ha ka MP elekshon, ngin rah biang pat mynta sa shisien ha kane ka MDC elekshon bad ngeit skhem ruh ba lyngba ka sur kaba skhem na ki paidbah ngin ïohi ïa ka jingjop”, ong u ong u Bah Powell.
Kumban shu kdew hangne, u Bah Powell Sohkhlet, u la long u nongtrei ba shitrhem bad u ba aiti lut ïalade ha ka kam lad pathai khubor, ban ai jingshakri ai jingtip sha ki paidbah ha ka Jylla, kyrpang eh ha ri lum Khasi bad Jaiñtia.
U la long u païa ba skhem ha ki kam pathai khubor na ka jingtrei hok bad jingtrei shitom jong u. U la ong u Joint Editor bad u radbah ban kyntiew ïa ka kot khubor Mawphor ha ki 30 snem tam naduh ba u la trei. Nangta u la don bynta ruh ha ka lad pathai khubor Ri Khasi Channel. Hynrei shwa ban shong thait na ka kam pathai khubor bad rung sha ka VPP, u la don bynta lang ruh sa ha ka Youtube Channel kaba la tip kum, ‘U Sangot U Pyrta’.