Shillong, Naiwieng 08: U Myntri Rangbah ka jylla u Conrad K. Sangma, u la plie ïa ka ophis ba thymmai jong ka Meghalaya Public Service Commission (MPSC) ha Dakopgre, Tura, West Garo Hills. Ha kane ka sngi la donlang u Lamphang ka Ïingdorbar Thaw aiñ ka jylla u Thomas A Sangma.
Ha kane ka sngi haba ai jingkren ha kane ka sngi u Conrad K Sangma, u la ong ba kane ka ophis MPSC kaba thymmai kan long ka jingmyntoi ïa ki samla jong ka thaiñ Garo Hills, ha kaba mynshwa ki la hap ban ïaid haduh 10 haduh 15 kynta ban leit sha Shillong na ka bynta ban thoh ïa ki eksam thungkam thungjam jong ka jylla.
“Kiba bun na ki samla ki thait ruh tang haba ïaid kjat ha ka por ba ki poi ha exam hall khlem shongthait. Da kane ka lad kaba thymmai, ki samla pule ki lah ban leh bha ïa ki exam jong ki bad kumjuh ruh ha ki interview hangne ha Tura,” u la ong.
U la ong ba ka jingïaid jngai bad ka jingbym ïoh ban shongthait jong ki kyrtong thoh eksam ka wanrah ka jingeh ïa ki ba kin ym lah ban thoh bha ïa ki eksam khamtam ki samla na Tura bad kiwei ki jaka jong ka jylla. “Kane kadei kawei na ki ophis kaba donkam bha kaba la lah ban plie kaba long ka jingmyntoi ïa ki samla,” u la ong.
U Myntri Rangbah u la pynbna ba ka eksam kaba nyngkong jong ka MPSC kan long ha Tura ha ka 14 tarik u Naiwieng, 2025, ha kaba kane kan long ka dak kaba kongsan na ka bynta ka kam thungkam ha ka jylla. U la ong ba ïa kane ka lad yn sa pynïar sha Jaiñtia Hills.
Ha kawei ka liang, u Lamphang ka Ïingdorbar Thaw aiñ u Thomas A. Sangma u la ong ba kane ka jingplie ïa kane ka ophis treikam ka long ka dak ban sah kynmaw bad kaba pyni ruh ïa ka jingtreikam kaba khuid, kaba shai bad ka sorkar kaba ïajan bad ki paidbah.
Kiwei kiba la donlang ha ka prokram ki kynthup ïa Deputy Commissioner ka West Garo Hills Vibhor Agarwal, Abraham T. Momin, Chairman, Tura bad ki heh ophisar na ka Meghalaya Public Service Commission bad kiwei kiwei ki tnat treikam ka sorkar.
La ong ba ka jingbuh ïa kane ka ophis treikam ka MPSC ha Tura kan pynsuk ban pynlong ïa ki eksam, ki interview, bad kiwei kiwei ki kam kiba ïadei bad ka jingthungkam, khamtam ïa ki kyrtong na Garo Hills, ha kaba kane kan ïarap ban pynduna ïa ka jingleit jingwan jong ki kyrtong kiba ïakhun ïa ki eksam kam sorkar.
