Shillong, Lber 08: U Myntri ka Tnad Labour Bah Shakliar Warjri ha ka sngi Thohdieng ula pyntip ba ka Ophis u Block Labour Officer, Laskeiñ kam pat khang satia hynrei mynta ka treikam na ka Ophis u District Labour Officer, Jowai, West Jaiñtia Hills.
Haba jubab ha ïingdorbar, u Bah Shakliar ula ong ba ka daw ba rah ïa ka Ophis u Block Labour, Laskeiñ sha Jowai ka dei namar ka jingbym biang ka kor internet.
Ula kular ruh ba ïa kane ka Ophis yn sa rah biang noh shen sha Laskeiñ.
U MLA ka UDP na Mowkaïaw Bah Nujorki Sungoh haba pynpaw ïa ka jingsngew halor kane ka rai, u kwah ban tip la ka daw ka lah ban dei namar ka jingjai tuh ki nongtrei ban wan sha Nongkyndong.
U la ai jingmut ruh ïa ka jingdonkam ba ka Sorkar kan pynkhlaiñ ïa kum kine ki ophis khnang ba ki nongbylla kin ym donkam ban wan shaduh ka District Headquarter ban leh registration.
Halor kane, u Bah Shakliar ula ong ba ka Tnad kan sa wanrah ïa ka jingtyrwa ban pynbun ïa ki Block Office hapoh ka Jylla.
