Ka “One Election, One Nation” dei tang ka jingthmu ban pynduh ïa ki seng riewlum : Vincent Pala

Shillong, Nohprah, 18: Ka Meghalaya Pradesh Congress Committee (MPCC) ha ka sngi Balang ong ba ka jingthmu jong ka Sorkar National Democratic Alliance (NDA) ba la ïalam da ka BJP ban pynlong tang kawei ka elekshon ha kajuh ka por ha ka ri baroh ka dei tang ka jingthmu ban pynduhjait ïa ki seng riewlum haba pynpaw ïa ka jingbym sngewïahap ïa kane jingthmu ba la tyrwa da ka Sorkar Pdeng.
Ha ka jingïakren bad ki lad pathai khubor, u President jong ka MPCC u Bah Vincent H Pala u la ong, “ka One Nation, One Election ka mut ba ki elekshon Assembly, District Council bad Lok Sabha kin long lang ha kajuh ka sngi bad da kaba pynlong kumne, ki party Riewlum kin duh lad.”
“Kum ka seng Congress ngim sngew ïahap ïa kane namarba ha kane ka ri synshar paidbah ngi dei ban ïatreilang lang bad ngim dei ban shukor ïa ka mon jong u paidbah,” la pynpaw u President ka MPCC.
U la ong ruh ba ka Congress kam hun satia ïa kane ka jingtyrwa bad kam ruh ba ka BJP ka sngewthuh ba kam lah ban ïoh ïa ka jingmynjur ha ha Parliament namarba ki donkam lai na ka saw bynta ha ka jingbun paid hynrei ka leh khnang ïa kane khnang ban pynklet ïa ka jingthmu bad ïa ki polisi kiba bakla kiba ka shim bad ka wanrah ïa kane tang ban pynthame ïa ki paidbah.
Shuh shuh u la ong, ba ka “One Nation One Election,” ka BJP ka leh khnang namarba ka tip ba kiwei ki seng saiñpyrthei kin ym lah ban pynmih kyrtong kumba pynmih ki seng sha rithor. Ka BJP ka dang mut ba kiwei ki party kin ym lah ban sei ïa ki kyrtong bad kane kan pynduh lad ïa ki seng riewlum ban jop.
Ka Kynhun Myntri jong ka Sorkar NDA ka la mynjur ïa ka Aiñ-rew ban pynlong ïa ka elekshon ha kajuh ka por ha baroh kawei ka ri hadien ka jingai jingmut jong ka komiti ba la khlieh da u President barim ka ri u Ram Nath Kovind.