Shillong, Jylliew 17 : Ka Khun Hynnniewtrep National Awakening Movement (KHNAM) mynta ka Sngi Saitjaiñ ka la pynpaw ba ka Office Memorandum (OM) ba thymmai ba la pynmih halor ka Reservation Roster ka dei kaba la pyntreikam naduh ba sdang ne kaba phai dien trai namar ka long naduh ba sdang ka Reservation Policy ha ka jylla bad kane ka long kaba beaiñ.
Ka KHNAM ka la kyntu ïa ki party kum ka Congress, TMC, HSPDP, UDP kiba la pynpaw ba ki sngew hun halor ka rukom pynshai ka sorkar ïa k a Roster ba ki dei ban shim ka jingkitkhlieh halor kane ka jingpyntreikam jongka sorkar ïa ka Roster System naduh kaba sdang.
Ka kyntu ruh ïa ka VPP ba kan bishar bniah bha halor kane ka roster system beaiñ ka ban sa ktah jur ïa ki samla ka bri u hynniewtrep.
“Ka OM ba thymmai ka dei kaba pyntreikam naduh ba sdang ( Retrospective) bad la pynmih ïa ka ha kata ka rukom kaba kyllaiñ bha ban ïalam bakla bad pynkulmar jingmut ïa ki paidbah. Ngin ym shongthait satia halor kane ka jingleh beaiñ ban pyntreikam ïa kane ka roster system naduh ba sdang” ong u Working President ka KHNAM u bah Thomas Passah.
ïa kane u la ong hadien ba la ïoh ban bishar bniah ïa ka OM ba la pynmih da ka sorkar ha ka 14 tarik u Jylliew hadien ba ka Kynhun Myntri dang shen ka la rai ban wanrah jingpynkylla ïa ka OM ba la pynmih ha ka 10 tarik Jymmang 2022.
U Bah Passah u la ong ba lada ïa nujor ïa ka OM ba 10 tarik Jymmang 2022 bad ka OM ba 14 tarik Jylliew 2023 kam da don ka jing ïapher eh haduh katta katta.
“Ha kane ka OM ba thymmai ym shym la pynpaw naduh kano ka tarik yn pyntreikam ruh bad ka khlem kren shai ruh ba kan treikam naduh ka 10 tarik Jymmang 2022 kumba la kular hakhmat ki seng saiñ pyrthei ha ki jingïalang ba la long arsien bad ka sorkar. Kumta kane ka pynpaw ba ka sorkar ka buhrieh ïa ki jingshisha da kaba rai ban pyntreikam ïa ka Roster naduh ba sdang” ong une u nongïalam ka KHNAM.
Ka jingïapher hapdeng ka OM ba rim ad kane ka OM ba mynta ka dei tang ka jingpynkylla ïa ki kyntien.
Nalor kata u la ong ruh ba ym don hangno hangno ruh ha kane ka OM ba thymmai ban kdew ba yn pyntreikam ïa kane ka roster system nangne shakhmat kumba la ïakut bad ïamynjur da ka sorkar ha ka jingïalang bad ki seng saiñ pyrthei “ Kumta katba ka sorkar ka dang pyntreikam ïa ka Roster System naduh u snem 1972 bad katba ka dang buh jingkheiñ jingdiah ha ki register kane ka pynpaw ba ka roster system kan dei beit naduh kaba sdang ym nangne shakhmat.
U la ong ba ka KHNAM ka buh ruh ïa ki jingkylli ha ka Congress, TMC HSPDP bad UDP kiba pynpaw ka jingsngewhun halor ka jingpynshai ka sorkar ïa ka roster, hato haba kumne kin shim ka jingkitkhlieh na ka bynta kane ka jingpyntreikam naduh kaba sdang da kane ka sorkar MDA ba ïalam ka NPP?.
Kumta u la ong “ Kine ki seng saiñ pyrthei kiba don ha ka sorkar ki dei ban pynshisha sha ki paidbah la ki dei tang ki seng ba ïasynrop lang ne ki dei ki mraw jongka NPP?”.
Haba kyntu ïa ka VPP ba kan shim khia halor kane ka Roster beaiñ u bah Passah u la ong “ Ngi kyrshan barobor ïa ka VPP halor ka jingdawa jongka ban bishar bniah biang ïa ka Reservation Policy 1972 ka dei ruh ban ïakhun ba ka roster ka dei ban treikam nangne shakhmat ym dei da kaba phai dien trai naduh kaba sdang. Ngi tip shai ba ka VPP ka dang shu sngap halor ka roster namar ka pynleit jingmut beit ban bishar bniah biang ïa ka Reservation Policy. Hynrei kumba ka paw mynta ban bishar bniah biang ïa kane ka policy ka lah ban shim por bha ban ïa kaba ïa mutdur bad ngi ïohi ba ka long kaba donkam haduh katta katta ban phai khmat sha ka rukom pyntreikam ïa ka roster system na ka bynta ka lawei ki khun samla kumta ngi kyrmen skhem ba ka VPP kan shim khia ïa kane ka roster system ba long beaiñ bad kaba ktah jur ïa baroh”.
