Nongpoh, Ïaiong 12: U Bah Prestone Tynsong ba dei u National Vice President ka party NPP ba long ruh kum u Symbud Myntri Rangbah ka jylla u la kop baka party NPP kan synshar marwei haka jylla haka elekshon ban wan bad kan sar ha baroh ki constituency ka Ri-Bhoi District, haba kren haka jingpdiang burom ïaki nongïalam jong ka UDP, Congress bad BJP kiba la leit pynïasoh bad ka NPP mynta ka sngi haka jingïalang kaba la long haka shnong Pahamlapong kiba la rai ruh ban kyrshan ïaka kyrtong NPP na Nongpoh ka kong Macdalyne S Mawlong.
Ha katei ka sngi ki nongïalam ba hakhmat jong ka party UDP hapoh ka jingïalam u Bah Lawrence Nongrum General Secretary ka Ri-Bhoi bad u Bah Rayonald Kharkamni Vice President, ryngkat ki nongkyrshan bad kumjuh ruh ka ki nongïalam ka party Congress hapoh ka jingïalam u Bah Plielad Tiewsoh President ka Nongpoh Block Congress Committee bad ki nongïalam naka party BJP kila leit ban pynïasoh ïalade bad ka party NPP bad la pdiang burom ruh ïaki da ka party NPP mynta ka sngi.
La sakhi ruh ha katei ka sngi da ka jingdonlang u Bah Prestone Tynsong National Vice President ka NPP bad synbud Myntri Rangbah ka jylla, Bah Sosthenes Sohtun MLA ka Jirang, Bah Teibor Pathaw MLA ka Mawlai, ka kong Macdalyne S Mawlong MDC ka Umsning ba dei ruh ka kyrtong jong ka NPP na Nongpoh Constituency, Bah Clement Mawlong President jong ka NPP ha Ri-Bhoi bad kiwei kiwei ki nongïalam jong ka party.
Na ka liang kitei ki nongïalam jong ka party Congress, UDP bad BJP kiba la wan ban pynïasoh mynta ka sngi kila rai ruh ban trei shitrhem bad ban kyrshan tyngeh ïaka kong Macdalyne S Mawlong kum ka kyrtong bad ban pynjop donburom ïaka na Nongpoh Constituency.
U Bah Prestone Tynsong haba kren ha katei ka sngi hadien ka jingpdiang burom ïakitei ki nongïalam na kiwei kiwei ki party kiba la wan ban pynïasoh bad ka NPP u la ong ba kane ka dei ka sngi kaba kmen bad kaba sah jingkynmaw ïaka party ha Nongpoh hadien ba kitei ki nongïalam na kiwei ki party ki la iohi ïaka jingkhlain bad ka jingtreikam jong ka party NPP haka jylla bad khlem artatien b aka party NPP kan dei ka party kaba lah ban synshar marwei haka jylla haka elekshon ban wan namar ki paidbah ki shaniah bad iohi ïaka jingtreikam jong ka hakine ki snem bala leit noh kaba la wanrah shibun ki jingkylla haka jylla.
“Kawei naki history bad ka jingjop jong ka jylla bala leh da ka sorkar MDA hapoh ka jingïalam jong Conrad Sangma President ka NPP ba dei ruh u myntri rangbah ka jylla ka dei halor u pud u sam bala shim kum ka mat ba kongsan eh ban pynbeit hapdeng ka jylla Meghalaya bad Assam bad kumba la dep ruh ban soi ïaka MoU bala lah ban pynbeit shuwa haki 6 jaka jong ki jaka kajia pud haka thaiñ Khanapara bad Pilangkata ha Ri-Bhoi naka bynta ka jingbit jingbiang jong ki paidbah ba shong bas ah ha katei ka thaiñ.
U la ong ruh ka sorkar hapoh ka jingïalam jong ka party NPP kila lah ban mang kumba 6500 klur naka bynta ban siang surok haka jylla bad kumba 1000 klur la mang tang ha Ri-Bhoi bad kane ka dei ka jingkyrkhu kaba khraw ïaki paidbah ha kaba u la pynbna ruh ba shen yn sa lah ban siang rong noh ïa u surok Nongpoh-Umden-Sonapur Road haka sien ba nyngkong yn mang shuwa kumba 70 klur ba shen ka sorkar kan khot tender noh bad pynlait ïaka work order nalor u surok Umling-Umrit bad kiwei kiwei.
Namarkata u la kyrpad ïaki paidbah kiba la poi ha katei ka sngi ba kin ai ka jingkyrshan ba pura ïaka party NPP ha kane ka elekshon ban wan kiba lah ban trei ïaka kam lada ki kwah ba shibun ki jingkylla kin wan kumba ka party NPP ka dei ruh kaba la sdang suhthied sha kiwei kiwei ki jylla jong ka thaiñ Shatei Lam Mihngi, da kaba kynthoh ruh ba ka long kaba eh ban ïakynduh ïaki nongïalam Congress ha Delhi, hynrei ïaki nongïalam NPP lah ban kynduh ha kano kano ka por.
Naka liang ka kong Macdalyne S Mawlong kala pynpaw ba katei ka jingwan pynïasoh ki nongïalam na kiwei ki party sha ka party NPP kan long ka jingkyrmen ïaka party khamtam ha Nongpoh namar ki iohi ba dei tang katei ka party kaba lah ban wanrah ïaki jingkylla bad ban thaw sorkar ha kane ka elekshon ban wan bad ban peit ïaka eh ka shon ki paidbah naka bynta ki jingkylla bad kyrpad ruh ba kin trei shitom naka bynta kane ka elekshon ban wan.
