Shillong, Jylliew 25 : Ka National People’s Party (NPP) kaba ïalam ia kane ka sorkar Meghalaya Democratic Alliance (MDA) hangne ha jylla ka la rai ba kan ïakhun marwei ha ka election MLA 2023 namar ka don ka jingkyrmen skhem ba kan jop bun ha kane ka kynti bad kan ïoh ban ïalam hi ïa ka jingsynshar.
“ Ngi kwah ban jop bun eh ha kane ka kynti ban ïalam hi ïa ka jingsynshar na kata ka daw ngi la long kiba la pynkhreh naduh mynta” ong u Symbud Myntri Rangbah bah Prestone Tynsong.
U la ong ka NPP ka kwah ban ïakhun marwei bad kam don kano kano ka jingthmu ban ïatehlok lypa bad kano kano ka party shwa ka election MLA 2023.
Haba la kylli hato kan don ka jingsngew pyrshah na ki paidbah khamtam ba ka NPP ka ïalam ïaka jingsynshar haba bun ki jingshah kynnoh, u bah Prentone u la ong “ ïa kata ngin ieh haka jignstad jong ki kyrtong jong ngi. Ngam kwah ban ïathuh ïa phi kumno ngi la long kiba la pynkhreh namar ngin batai lypa ha ki kyrtong jong ngi kumno ban kren bad ïasaid haba ïeng ha rynsan”.
U la ong ba ka NPP kam don por ban ïai pynshai ïa kino kino ki jingkynnoh pyrshah sorkar namar ka thong jongka ka long ban leit sha ka election da ka jingkyrmen ban ïoh ka jingkyrshan naki paidbah bad ban jop bun ha kane ka kynti. “ Ki briew ki la tip bad ïohi kaei ka NPP bad kaei ka jingïapher na kiwei ki party hangne ha Meghalaya. Ki paidbah ki tip ruh kiei bad kiba kumno ki kyrtong jongka kumta ka shu long bijai ei ka por ban shu ïa pynshai ïa ki jingkynnoh. Kan bha ban ïa pynlut por kumno ban leit sha ka election bad ban jop bun” ong u bah Prestone.
U la ïathuh ruh ba ka party kam pat rai mano ban long u kyrtong Chief Minister jongka. Namar u la ong ha Meghalaya ki paidbah ki jied ïa u kyrtong uba ki ieit ym da dei eh tang ïa ka party. “ Hangne ha Meghalaya ka don ka jingïapher kaba khraw na kiwei pat ki jylla bad na kata ka daw man la ka san snem ki kyrtong shimet ruh ki jop beit lada ym dei ba ki paidbah ki jied ïa u kyrtong uba ki ïeit kumno kine ki kyrtong laitlan (independent) kin ym jop shi jop man la ka san snem” pynkut u Symbud Myntri Rangbah.
