Ka NPP ka shu ïai shah ïa ki jingkynnoh ki BJP Megh namar ba ka ïadei bad kiba na Delhi

Shillong, Jylliew 8 : U Symbud Lamphang ( Dy Speaker) ka jylla u Timothy D Shira uba dei ruh uwei na ki nongïalam ka NPP ula khyrwit kylla ïa u Bernard Marak halor ki jingïai kynnoh jongu ïa ka sorkar MDA da kaba u la ong ba lada u Bernard lei lei u ïohlad un kham bamsap ma u ban ïa kiwei.
U la ong ba ka NPP ka shu ïai shah ïa kine ki jingkynnoh jong ki BJP na kane ka jylla Meghalaya khamtam na u Bernard tang namar ba ka don ka jingïadei kaba jan bad ki nongïalam ka BJP na Delhi.
U la ther tyngeh ïa u Bernard namar ula ngiah ban peit bad pule na ka por sha ka por ïa ki jingkynnoh ba khlem nongrim jong u Bernard ïa u Myntri Rangbah u Conrad K Sangma uba ïalam ïa kane ka sorkar MDA kaba ka BJP ruh ka ïasynrop lang.
U Shira ula ong “ Ym baroh ki nongïalam ka BJP ki long kum u Bernard bad ngam tip hi ruh kaei ka kyrdan jongu ha ka party hynrei u la shu kynnoh shaba palat pud ïa u Myntri Rangbah bad ïa ka NPP. U Shira uba la long MLA la lai sien na Resubelpara u la ong ba une u MDC ka BJP lei lei u dei mynshwa tang u riew kieng atiar ne u kaikhlaw hynrei dei haba u la wan pyndem u sa long riew saiñ pyrthei.
“ Pyrkhat shwa ïa u, u dei uei shwa ba un wan sha ka imlang ka sahlang. U dei tang u riew kieng atiar bad kaei kaba u la leh haba u rung sha ka kynhun kiengatiar. Hato um bamsap da ki kam dawa pisa. Hato u dei u briew uba bha?” kylli u Shira.
U la ong shuh shuh kaei ka thong jong katei ka kynhun kieng atiar ki shu kam ba ki trei na ka bynta ki paidbah, hynrei ki shu siat iap ïa kiba lui lui bad dawa pisa hato kane kam dei ka bamsap. Hato kane ka dei ka kam ba bha? kylli u Shira. ïa kiba kum kine ki jait briew ki paidbah ki dei ban bishar bad pyrkhat arsien namar lada u ïoh lad un dang kham bamsap shuh shuh ma u ban ïa kiwei.
Halor ka jingïai shah jongka NPP u Shira u la ong ka daw ka dei namar ba ka don ka jingïadei kaba jan bad ki nongïalam ka BJP na Delhi. “ Ki don ka jingïadei kaba jan bha bad ka NPP khamtam bad u myntri rangbah u Conrad K Sangma. Namar ba ngi burom ïa kane ngi shu iai shah wat la ki kynnoh kumno kumno ruh.Kiwei kiwei ki nongïalam ka BJP ha ka jylla ruh ki biang ym baroh ki dei kiba pyshah sorkar namar kum u bah Sanbor Shullai dang shen u la kyntu ïa u bah Ernest Mawrie bad bah A.L Hek ba kin kham tyngkan ha ka ktien ka thylliej kumba ka BJP ka ïatrei lang bad ka sorkar MDA. Kane ka jingong u bah Sanbor ka long kaba dei eh” ong u Timothy.
U la ong “ Ngi kwah ban ïatrei lang bad ka BJP ha ka sorkar jylla namar ha ka sorkar pdeng ruh dei ka BJP kaba synshar bad kane kan ïarap ïa ka jylla ha kiba bun ki liang nalor kata ngi na ka NPP ruh ngi kyrshan ïaka BJP hi ha Delhi.Kumta ka dei ban don ka jingïatrei lang ban ïai bteng ka jingïadei”.