Ka NPP ka kren tang 2% bad trei pat haduh 98%, ong u Bah Sniawbha

Shillong, Rymphang 13: U National General Secretary ka National People’s Party (NPP) bad Symbud Myntri Rangbah u Bah Sniawbhalang Dhar ha ka sngi Palei u la kyrpad ïa ki paidbah ka Ri-lum Jaiñtia ban vote ïa ka seng National Peoples Party (NPP) ha kane ka elekshon JHADC ban wan namar ka party ka dei kaba trei kham bun bad kren duna bha.
Ha kaba ïadei bad kane haba kren ha ka jingïalap elekshon ha shnong Ïongkaluh ban pan jingkyrshan ïa u Bah Phasmos Dkhar, u MDC ba la ar samoi ka NPP na Musniang-Rangad, u Bah Dhar ula ong, “Ha ka por elekshon, kiwei ki seng saiñ pyrthei kin wan bad kular shibun kiei kiei hynrei phi dei ban kynmaw ba ka NPP ka dei ka party kaba kren tang 2% bad trei pat haduh 98%.”
“Ki don kito kiba kynnoh ba ka NPP ka la leh ïa ki kam synshar donbor bad leh shilliang hynrei lada ngi leh shisha ïa kata, balei pat ba ngi theh da ki klur tyngka sha ki kam pynroi ha ka constituency kum ka Khliehriat, kaba don u MLA uba dei na ka United Democratic Party (UDP). Ngi la bei da ki klur tyngka ki kam pynroi na ka bynta ka jingmyntoi bad ka bha ka miat u paidbah. Kumta, nga kyrpad ïa ki paidbah ba kin rai da ka jingstad ha shuwa ba kin thep vote. Kane ka long namar kawei ka vote ka im haduh 1825 sngi kaba mut 5 snem,” ula ong.
Haba kyntu ruh ïa ki paidbah ka Ïongkaluh ban ai ka jinshaniah ha ka NPP da kaba jied biang ïa u Bah Dkhar sa shisien, u Symbud Myntri Rangbah ula ong, “Nga kyrpad ïa ki paidbah ba kin vote ïa u Dkhar lada phi kwah ïa ka Sorkar ba don ar engine. Ym tang katta, vote ïa u namar u dei u nongïalam uba la shemphang bad u la dei ruh u Executive Member (EM), uba la trei shitom bad noh synniang shikatdei eh ïa ka constituency bad ka thaiñ baroh kawei.”
Halor kane u la ong, “Kumta, pynthikna ba un ïoh palat 1200 vote bad hadien ka elekshon, u lah ban pynthut ïa ka ha kano kano ka kam ba ïadei bad ka shnong jong phi,” ong u Bah Sniawbha.
Ha kaba ïadei bad kane, u nongïalam ka NPP ula ong ba kam donkam satia ban sheptieng ïa ka Liang Pyrshah Voice of the People Party (VPP) namar tang kito ki bym kwah ïa ka roi ka san ba shisha kin vote ïa ki.
U la ong, “Nga shim ruh ïa kane ka kabu ban kyrpad ïa baroh ki paidbah ba kin ym pynleh nohei kai ïa ki vote jong ki bad kim dei ruh ban ngop na ki jingrwai elekshon ba ban, hynrei ban thep ïa ki vote na ka bynta ka roi ka san.”
U la ong ruh ba ka NPP ka la lah ban wanrah ïa ka roi ka san da ki klur bad phew klur tyngka tang ha kine ki 7 snem ba la ïalam ïa ka Sorkar hapoh ka Jylla.
U la ong, “Ki briew ki kynnoh laiphew jait ïa ngi namar ngi dei ka Sorkar kaba treikam. Ka Sorkar ka bym shah kynnoh kadei ka Sorkar ka bym treikam eiei ruh em. Kumta, nga kyrpad ïa phi ban vote ïa ka NPP ban ïoh ïa ka Sorkar kaba skhem.”
U Bah Sniawbha ula ïathuh lypa ruh ba ka VPP kan ym tam ïa ka jingïoh MDC ba palat 6 ngut ha kane ka elekshon ADC da kaba ong, “Ha kane ka kynti, ngam tharai ba kin jop palat ïa ka 6 seat namar ki paidbah ki la sngewthuh ba ka sepei ban jop lada kam don ka roi ka san”.
Haba kren ha ka jingïalang, u Bah Phasmos Dkhar ula kular ban bteng ha ka ban wanrah ïa ka roi ka san hapoh ka constituency lada u shah jied biang kum u MDC. “Ki dang don shibun ki kam kiba nga hap ban leh eiei lada nga shah jied bad kane ka urlong tang lada phi ai ka jingshaniah ha nga kum u MDC jong phi”.