Shillong, Nailur 26 : U Bah DP Wahlang, IAS Chiesf Secretary ka sorkar jylla u la ong ba ka jingpynlong ïa ka North East Olympic Games 2022 kam dei shuh ban dang jia ki jingdkoh ha ka rukom pynïaid kumba long ha ka Meghalaya Games 2022.
Ïa kane u Bah DP Wahlang u la ong haba ai jingkren ha ka jingïalang plie paidbah ïa ka 2nd North East Olympic Games 2022 ha ka janmiet jong ka sngi Thohdieng ha Pinewood Hotel.
“Kumba ngi la sakhi ïa ka jingdkhoh ha kaban pynlong ïa ka Meghalaya Games khamtam ka jaka sah na ka bynta ki nongïalehkai kumta ha ka North East Olympic Games kam dei shuh ban dang long biang kumjuh,” La ong u Bah DP Wahlang.
Ban pynthikna ba katei ka lympung kan ïaid beit ïaid ryntih na ka liang u Chief Secretary u la kyntu ïa ka MSOA bad ka tnad Sports and Youth Affairs ba kan peit bad khmih bha ban pynbiang ïa ki jingdonkam jong ki nongïalehkai.
“Ka MSOA bad tnad ïalehkai kidei ban phikir bha ïa ka jingdonkam ki nongïalehkai ba ki jaka sah kidei ban long kiba khuid ba suba, ka bam ka dih kaba biang ym shuh kumba ka la jia ha ka Meghalaya Games,” ong u Bah DP Wahlang.
Kum ban pynkynmaw hangne ba ha ka jingpynlong ïa ka Meghalaya Games 2022 ka la mih ka jingshah kynthoh kaba jur nïa ka MSOA ha kiba bun balang halor ka jingsaphriang ki dur bad video ha ki social media ba ki nongïalehkai ki la hap ban thiah ha ki jaka kiba jaboh bad lang um, ka jingbym khuid bym suba ki jaka leit shabar.
U Bah DP Wahlang u la ai khublei ïa ka tnad ïalehkai ka jylla kaba la trei shitom ha kaban kyntiew ïa ki kam ïalehkai bad kaba la plie ki lad ki lynti na bynta ki samla, ki heprit ban pynpaw pyrthei ïa ki sap ïalehkai bad ha kajuh ka por u la kitbok ruh ïa ki nongïalehkai kiban sa leit ban ïashim bynta ha ka National Games kaban sa long ha Gujarat ba kin ïalehkai bha khnang ba kin ïoh ban wanrah nam bad burom ïa ka jylla.
