Ka nongïalam TMC ka wan kular ai 1000 ha Meghalaya, tip ha jylla la jong ki ai neem : James K Sangma

Shillong, Nohprah 14 : U Myntri ka tnad ka Koit ka Khiah ka jylla ba dei ruh u General Secretary ka National People’s Party (NPP), u James K Sangma u la ong ba ka jingwan kular jong ka khlieh duh ka Trinamool Congress, ka Mamata Baneerjee ban ai 1000 tyngka shi bnai sha ki longkmie ha Meghalaya ka pynsuba ba kadei tang ka buit ban pynbiej elekshon ym da kumwei pat.
Haba kren bad ki lad pathai khubor, u James u la ong, “Ka jingpynbna skhim jong ka Chairperson ka TMC ka dei tang na ka daw ba ka elekshon ka la jan bad kum kine ki jingkular ki dei tang ban pynbiej ïa ki nongthep vote,” u ong da kaba bynrap ruh ba ki paidbah ki dei ban peit ruh ïa kaei kaba ka sorkar jylla ka la wanrah bad ai.
Da kaba ong ba kiba kular ki lah ban kular wat ïa u bnai ruh, u Myntri u la buh jingkylli ruh ïa ka TMC la ha ka jylla West Bengal ki la pyntreikam neem ïa kitei ki jingkular ba ki wan pynbna ha Meghalaya. “Nga tharai ki paidbah ka Meghalaya ki sngewthuh shai ïa katei ka jingkular.”
Nalorkata, u ong ruh ba ki paidbah ka jylla ki tip biang biang kumno u Myntri Rangbah ka jylla, u Conrad K Sangma u pynurlong ïa ki kular kiba watla kim dei 100 persen hynrei u la lah pat ban pynurlong ïa kaba u kular.
Da kaba bynrap biang halor katei ka jingwan kular jong ka nongïalam TMC, u Myntri u ong ba lehse ka jingthmu ban ai kadei kaba bha hynrei hap ban peit bniah pat namar katei ka jingkular ban ai 1000 tyngka kadei tang ïa ki longkmie. “Lada ka long kumta balei kim ai lang ruh ïa ki samla balei ki iehnoh ïa ki. Ki la dei ban phai khmat sha ki ruh khnang ba kin lah ban ieng ha la ki jong ki kjat ban seng kam seng jam. Balei ki iehnoh ïa ki nongrep ban leh shiliang kumne ha shuwa ka elekshon kan ktah ïa ki paidbah,” u la bynrap biang.
Kumta, u ong ba ka long kaba donkam ban peit ba kam dei satia ban shu pynbiej ïa ki paidbah tangba la jan ka elekshon.
Haba jubab pat halor ka jingkynthoh da ki nongïalam ka TMC ba ïa ka jylla Meghalaya la pynïaid da u Myntri Rangbah na Assam na ka liang u James K Sangma u la ong ba kitei ki jingkren ki dei tang ki jingkren khunlung khynnah suda bad ka jingkren khlem da tip ïa kaei kaei ruh.