Shillong, Naiwieng 14: U Myntri Rangbah ka jylla u Conrad K Sangma, ha ka sngi Palei u la plie ïa ka 6th Helicopter & Small Aircraft Summit 2024 ha Courtyard, Marriott, Shillong. Ïa kane ka summit la pynlong da ka Pawan Hans Ltd and FICCI bad kaba la kyrshan da ka Ministry of Civil Aviation, Government of India bad kumjuh ruh ka sorkar jylla kum shi bynta ban pynïar ïa ka kam buh helicopter bad kumjuh ruh ki liengsuiñ kiba rit ha kylleng jong ka ri.
Ha ka jingkren na ka liang jong u Conrad K Sangma, u la ai khublei ïa ka Ministry of Civil aviation ba ka la jied ïa ka nongbah Shillong ban pynlong ïa kane ka jingïalang ne ka summit naba ka dei ha ka sien kaba nyngkong ha kane ka thaiñ shatei lammihngi ban ïoh ban pynlong ïa kane ka prokram.
“Nga kwah ban pynpaw ba ka Shillong ka dei ka jaka kaba biang bha ban ïoh pyndonkam ïa ki liengsuiñ kiba rit bad kum ki helicopter bad ha kaba kane kan kyntiew ïa ka ïoh ka kot jong ka jylla,” u la ong.
Na ka liang jong u ula ong ba ha kaba ïadei bad kiwei ki lad ban pynïasoh sha kane ka thaiñ shatei lammihngi kane ka jylla ka long ka jaka kaba biang bha ha kaba yn lah ban kyntiew ïa ka ïoh ka kot jong ka jylla bad kumjuh ban don ki jaka pynher ïa ki liengsuiñ.
“Nga kwah ban banjur ba kane kan ym dei tang ban kut hangne hynrei ba kane ka jylla kan long ka jingplie lad ïa kane ka thaiñ shatei lammihngi. Ka jingjngai ban shong liengsuiñ na Shillong sha Dhaka kan long tang 30 minit, na Shillong sha Bangkok kan long ym duna ïa ka 1 kynta bad kumba 15 minit bad kiwei pat ki nongbah jong kiba bun ki ri ha South East Asia ki ïajan bad ka nongbah Delhi. Kumta ka shim por kumba 2 kynta shiteng ban leit sha Delhi hynrei kan long kaba lyngkot na ka bynta jong ngi ban leit na Shillong sha Vietnam, Laos, Cambodia, Burma, Nepal, Bangladesh, Bhutan bad kiwei kiwei ki jaka. Hynrei lada ngi ïaid ha kiba bun ki jaka jong ka Act East Zone, kane kan ïarap ban kyntiew ïa ki kam jngohkai bad kiwei kiwei ki kam.”
Ha kaba ïadei bad ka jingdonkam ban kyntiew ïa ki lad liengsuiñ ha Meghalaya, na ka liang jong u Myntri Rangbah ka jylla u la ong ba ka sorkar ka la trei borbah ban kyntiew ïa ki kam jngohkai bad ha kaba kane ka dei ka lad ban kyntiew ïa ka ïohkam ïohjam jong ka jylla.
Na ka liang jong u ula kyntu ïa baroh ki nongshong shnong ban shim khia halor kane, naba kane ka long ka lad ban kyntiew ha ka kamai kajih.
“Na ka liang jong ka sorkar kan ai ka jingkyrshan ha kaba sdang bad kan ïarap ruh ban ïatreilang ha kiba bun ki bynta khnang ban lah ban kynjoh ïa ka thong na ka bynta kiba bun ki liang,” u la bynrap.
Haba kren shuh shuh ha kaba ïadei bad kane ka bynta na ka liang jong u Myntri Rangbah u la ong ba ka don ka lad ban kyntiew ïa ka kam liengsuiñ ha kane ka jylla da kaba pyntreikam ïa ka UDAN Scheme version 5.5 na ka bynta ban kyntiew ïa ki kam liengsuiñ ha kane ka jylla. Na ka jingdon jong ka liengsuiñ kan ïarap ban pynduna ïa ka jingïaid lynti na Shillong sha kiwei pat ki jylla bad mynta da ka jingpyntreikam ïa ka UDAN Scheme kan sa pynsuk ïa ka leit ka wan bad pynduna ruh ïa ka por haba leit ba wan. Nga ai khublei ïa ka Ministry of Civil Aviation khamtam ïa u Kinjarapu Rammohan Naidu, Hon’ble Union Minister jong ka Civil Aviation, ka sorkar pdeng ïa ki jingshim khia jong u ban kyntiew ïa ki kam liengsuiñ ha kane ka jylla bad kumjuh ruh ha ka ri baroh kawei.”
Ha kane ka prokram la ïashim bynta da ki heh ki haiñ na ka tnat bapher bapher kiba kynthup ruh na ka sorkar jylla.
