Ka NIT Meghalaya kan ïalam ïa ka jingsaiñdur 5G thymmai bad ka jingkyntiew ïa ki sap

Shillong, Rymphang 19 : Ka tnat Telecommunications (DoT), hapoh ka tnat Communications jong ka Sorkar Pdeng ka dang bteng ban kyntiew ïa ka jingseng ïa ki 5G Use Case Lab ha kylleng ka ri ban kyntiew ïa ka jingsaiñdur thymmai, kyrshan ïa ka roi ka par, bad pynstet ïa ka jingpdiang ïa ki teknoloji next-generation telecom.
Ha Meghalaya, la sdang ïa ka 5G Use Case Lab ha ka National Institute of Technology (NIT) Meghalaya, kaba ailad ïa ki samla pule bad ki nongwadbniah ba kin ïoh ïa ki teknoloji ba thymmai kum ki 5G network, Internet of Things (IoT), Artificial Intelligence (AI), edge computing, bad ki application telecom kiba dang mih. La khmih lynti ba kane ka lab kan don ka bynta kaba heh ha ka jingkyntiew ïa ki sap, ka jingwadbniah bad ka jingwanrah ïa ki jingpynbeit kiba ïadei bad ka thaiñ.
Ha ka thaiñ shateilammihngi, la dep seng phra tylli ki 5G Use Case Lab, kaba la pynkhlaiñ ïa ka jingsaiñdur thymmai ha ka thaiñ bad ruh ka kam wad bniah. Kine ki lad ki long kum ki rynsan ïatreilang na ka bynta ki jaka ai jingpule, ki startup, ki karkhana, bad ki nongwadbniah ba kin shna, pyrshang bad pynshisha ïa ki jingpyndonkam ïa ka 5G ha ki kam bapher bapher.
Ka sienjam 5G Use Case Lab ka ïahap bad ka jing thmu jong ka Sorkar ban ïoh ïa ka Digital India bad ka Atmanirbhar Bharat, kaba kyntiew ïa ka jingsaiñdur thymmai, kaba kyntiew ïa ka bor treikam jong ki samla, bad pynkhlaiñ ïa ka kam telecom. La khmih lynti ba kine ki lab kin noh synniang sha ka jingsaiñdur ïa ki application ha ki kam bapher bapher kum ka jingai jingsumar, ka pule puthi, ka kam rep, ki jingdon jingem, ka jingïada na ki jinglynshop ki bor ka mariang kiba dei ki kam kiba ïahap bha bad ka thaiñ shateilammihngi.