Shillong, Nailar 05: Ka tnad Forensic Medicine, NEIGRIHMS ka la kyntiew ïa ka Laboratory jong ka da ka lad treikam GCMS (Gas Chromatography and Mass Spectrometry). Kane ka tiar bishar bniah ka pynlah ban ithuh bad kheiñ thikna ïa ki jait bih (poisons) bapher bapher na ki nongmuna ba la shim na ki jaka sumar bad na ki nongmuna ba la shim na ka snam bad ka um pynjhieh. Ïa kane ka jaka la plie paidbah ha ka 2 tarik Nailar 2025, da u Director NEIGRIHMS, u Prof. (Dr.) Nalin Mehta, uba ka jinglong nongïalam ba shlur jong u ka la ïalam ïa ka jaka pule sha ka jingtbit ha ka liang ka saïan sumar (medical science).
U Prof. AJ Patowary, HoD ka Tnad Forensic Medicine u la pyntip ba ka Lab kan sdang ban test ïa ki nuksa na ki tnad ba hapoh jong ka NEIGRIHMS na ka bynta ban bishar bniah ïa ka jingbha bad jingbun jong ka kyiad ha ka snam bad hadien kata kan pynïar ïa kine ki jingshakri sha kiwei pat ki jaka treikam ryngkat bad ka jingthew bniah kaba kham ïar ïa ki bih. Ka jaka kan long kaba kordor bha ha ka thaiñ na ka bynta ka jingpeit bniah ha ka toxicology ha ka jingtohkit jong ki pulit.
Nalor kata, ka Tnad Forensic Medicine ka la pyndep ruh ïa ka hands-on training halor ka Virtual Autopsy ryngkat bad hynriew ngut ki nongïashim bynta na ki jaka pule ba pawnam bapher bapher jong ka ri India. Lah ban kdew ba ïa kane ka jinghikai la pynlong da ka jingbei tyngka na ka DHR (Tnad Health Research). U Director ka NEIGRIHMS u la sam ïa ki syrnot sha ki nongïashim bynta hadien ba ki la pyndep ïa ka jinghikai.
U Dr. Mehta ha ka jingkren jong u, u la ïaroh ïa ka tnad kaba la trei shitom ban sdang ïa kane ka kam thymmai bad khmih lynti ba ïa ka jingtip ba la ïoh da ki nongïashim bynta ha ka por ba ai jinghikai yn sa pynphriang sha kiwei pat ki bynta jong ka ri ruh kumjuh. U Prof. (Dr.) C. Daniala, Dean In-Charge bad Medical Superintendent, u Prof. (Dr.) Suvamoy Chakraborty ki la ai khublei ïa ka tnad na ka bynta ki jingjop jong ka.
