Ka NE Regional Front ka dei ka buit bad pynmih ka RSS bad BJP ban pharia ïa kiwei ki party

Shillong, Nohprah 01 : U President ka Meghalaya Pradesh Congress Committee u Ma Vincent H Pala, ula kynnoh ba ka jingtyrwa ban pynkha ïa ka Regional Front ha ka thaiñ Shatei Lam Mihngi, ba kynthup ïa ka NPP, TIPRA Motha bad kiwei, ka dei ka buit jong ka BJP ban phiah ne pharia ïa ki kynhun ba shun BJP ha ka thaiñ.
“Kane ka dei ka buit jong ka RSS bad ka BJP…ki kwah ban pynmih sa kawei ka shang ha kaba ïa kiba shun BJP yn buh ha ka, khnang ba kin nym leit sha ka Congress lane kiwei ki party” ong u Ma Pala haba sot ïa ka jingïakren hapdeng ki nongïalam ka RSS bad ka BJP.
U Ma Pala ula buh jingkylli ïa ka jingthmu ha kyndet ki kynhun ïatreilang, haba kdew ba bun ki nong ïalam ha kane ka Regional Front ki dei ki dkhot barim ka BJP lane kiba don jingïadei bad ka party. “Baroh ki dei ki paralok jong ka BJP hi…hadien ka elekshon kin sa leit ban ïatreilang bad ka BJP hi..kane ka dei shispah na ka shispah ka buit jong ka BJP” ula kynnoh.
Ula kyntu ïa ki paidbah ka thaiñ Shatei Lam Mihngi ba kin long kiba husiar, haba pynpaw ba kam don satia kano kano ka jingïapher hapdeng ka Regional Front ba dang thmu ban pynkha bad ka BJP.
“Ki paidbah ki dei ban kham shalak shuh shuh ban ïa kaei kaba ki thmu” ong u Ma Pala haba pynpaw ba ka kynhun ïatreilang ka dei ka buit jong ka BJP ban pynskhem ïalade ha ka thaiñ.